Qarın — Konstıtýtsııalyq Sottyń túsindirmesi taza normatıvtik-quqyqtyq sıpatqa ıe
ASTANA. KAZINFORM — Prezıdent Ákimshiligi basshysynyń birinshi orynbasary Erlan Qarın Konstıtýtsııalyq Sottyń búgingi túsindirmesi taza normatıvtik-quqyqtyq sıpatqa ıe. Bul – jańa Konstıtýtsııanyń kúshine enýine baılanysty týyndaǵan birqatar rásimdik máselelerge berilgen quqyqtyq jaýap ekenin aıtty.
— Atap aıtqanda, jańa Ata Zańnyń kúshine enýine baılanysty 1 shildeden bastap konstıtýtsııalyq normadaǵy bir rettik ókilettik merzim talaby qoldanylatyn laýazymdy tulǵalar taǵaıyndalýǵa tıis: Joǵarǵy Sottyń Tóraǵasy, Bas Prokýror, Konstıtýtsııalyq Sottyń tóraǵasy men sýdıalary.
Osyǵan oraı «Bir rettik ókilettik merzimge qatysty normany qazirgi is basyndaǵy laýazymdy tulǵalarǵa qoldaný kerek pe álde olardyń qaıta taǵaıyndalýyna múmkindik bar ma?» degen saýal týyndaǵan edi.
Konstıtýtsııalyq Sottyń túsindirmesi atalǵan máselege naqty quqyqtyq jaýapty usynady: bir rettik ókilettik merzimge qatysty norma jańa Konstıtýtsııa kúshine engennen keıin tıisti laýazymdarǵa taǵaıyndalǵan adamdarǵa ǵana qoldanylady. Quqyqtyq retteýdiń birizdilik qaǵıdatyna sáıkes, bir rettik ókilettik merzim jónindegi norma qazirgi Prezıdentke de qatysty bolady, — dedi ol.
Bul rette, Prezıdenttiń jeti jyldyq bir ǵana merzimge saılanýy týraly ereje memlekettiń Egemendigi, Táýelsizdigi, ýnıtarlyǵy, aýmaqtyq tutastyǵy jáne basqarý nysany sekildi múldem ózgermeıtinin atap ótý qajet (QR Konstıtýtsııasynyń 43-baby, 5-tarmaǵy).
— Konstıtýtsııalyq normalardyń atalǵan túsindirmesi qandaı da bir tulǵanyń avtomatty túrde taǵaıyndalatynyn nemese saılanatynyn bildirmeıdi. Ol tek tıisti tulǵanyń saılaýyna nemese taǵaıyndalýyna quqyqtyq múmkindigi bar ekenin aıqyndaıdy. Osylaısha, Qazaqstan Respýblıkasynyń Konstıtýtsııasyna sáıkes búgin Memleket basshysy Bas Prokýrordy taǵaıyndady.
Konstıtýtsııalyq Sottyń búgingi sheshimi — jańa memlekettik-saıası modeldi qalyptastyrýmen baılanysty aýqymdy úderistiń kezekti bir bóligi ǵana. Qazirgi tańda jańa ınstıtýttardy iske qosý boıynsha josparly jumys jalǵasýda: Quryltaı saılaýy taǵaıyndaldy, saıası partııalar sezderin ótkizýde, sondaı-aq «Qazaqstan Halyq Keńesi» hatshylyǵyn qurý týraly Jarlyqqa qol qoıyldy, — dedi Qarın.
Eske salsaq, budan buryn Konstıtýtsııalyq sot Memleket basshysynyń qyzmetin burynǵy qoldanysta bolǵan Ata zań boıynsha atqaryp kele jatqan Prezıdent, Konstıtýtsııalyq sot tóraǵasy, Joǵarǵy sot tóraǵasy jáne Bas prokýrordyń osy qyzmetterge jańa Konstıtýtsııanyń kúshine enýine oraı saılaný ne laýazymǵa taǵaıyndalýyn resmı túsindirý týraly ótinishine jaýap berdi.
Sonymen qatar sarapshy Ǵazız Ábishev Konstıtýtsııalyq sottyń sheshimine qatysty pikir bildirdi.
