Qarın: Búginnen bastap múlde jańa zań shyǵarý ınstıtýty jumysyn bastaıdy
ASTANA. KAZINFORM — Quryltaıdyń jumysyn bastaýy saıası júıeni tolyq ınstıtýtsıonaldyq qaıta júkteýdi bastaıdy. Bul týraly QR Prezıdenti Ákimshiligi Basshysynyń birinshi orynbasary Erlan Qarın atap ótti.
Búgin Prezıdent Qasym-Jomart Toqaev birinshi shaqyrylymdaǵy Quryltaıdyń alǵashqy sessııasyn ashty. «Alǵashqy sessııa», «birinshi shaqyrylym» degen tujyrymdardyń ózi bul oqıǵanyń aıryqsha tarıhı mańyzyn aıqyndaı túsedi.
Osydan bir jyl buryn Memleket basshysy bir palataly Parlamentke kóshý ıdeıasyn usynǵan bolatyn. Mine, 355 kúnnen keıin bul ıdeıa jumys toby men Konstıtýtsııalyq komıssııa aıasynda uzaq, tereń ári jan-jaqty talqylaý kezeńderinen ótip, Jańa Konstıtýtsııanyń búkilhalyqtyq referendýmda qabyldanýy jáne Quryltaıǵa saılaý ótkizilýi nátıjesinde praktıkalyq turǵydan júzege asty.
Sondyqtan búginnen bastap múlde jańa zań shyǵarý ınstıtýty — bir palataly Quryltaı óz jumysyn bastaıdy. Jańa joǵary ókildi organǵa jańa ókilettikter berilip, bılik tarmaqtary arasyndaǵy neǵurlym ornyqty tepe-teńdik qamtamasyz etiledi. Quryltaı Vıtse-prezıdent, Premer-mınıstr laýazymdaryna usynylatyn kandıdatýralardy, sondaı-aq Konstıtýtsııalyq sottyń, Joǵarǵy sottyń, Ortalyq saılaý komıssııasynyń jáne Joǵary aýdıtorlyq palatanyń quramyn kelisetin bolady.
Eń bastysy — konstıtýtsııalyq reforma men Quryltaı saılaýy úlken saıasatqa jańa tulǵalardyń, qoǵamdyq qaıratkerlerdiń jańa býynynyń kelýine jol ashty.
Muny sońǵy shaqyrylymdaǵy Parlamentpen salystyrǵanda depýtattyq korpýstyń sapalyq quramynyń aıtarlyqtaı ózgergeninen anyq kórýge bolady. Áıelderdiń ókildigi eki esege artsa, jastardyń úlesi úsh esege ósti. Depýtattardyń ortasha jasy tómendep, búginde 45 jasty qurap otyr.
Depýtattar qatarynda burynǵy Ulttyq Quryltaıdyń 22 múshesi jáne máslıhattardyń 26 eks-depýtaty bar. Quryltaı quramyna Prezıdenttik jastar kadr rezerviniń 10 múshesi, Jastar saıasaty jónindegi keńestiń 4 múshesi, Áıelder isteri jónindegi ulttyq komıssııanyń 5 múshesi saılandy. Sonymen birge ınstıtýtsıonaldyq sabaqtastyq ta saqtalyp otyr — 24 depýtattyń parlamenttik jumys tájirıbesi bar.
Depýtattar arasynda tájirıbeli memlekettik qyzmetshiler, partııalyq fýnktsıonerler, ǵalymdar men sarapshylar, kásipkerler, agrarlyq sektor men ónerkásip mamandary, IT, shyǵarmashylyq, kreatıvti jáne medıa ındýstrııa ókilderi, etnomádenı birlestikter músheleri, volonterlik qozǵalys ókilderi men jastar belsendileri bar.
Osylaısha, Prezıdent Toqaevtyń reformalary kóptegen belsendi azamattar men óz isiniń kásibı mamandaryna óz áleýetin júzege asyrýǵa naqty múmkindik berip otyr.
Quryltaıdyń jumysyn bastaýy saıası júıeni tolyq ınstıtýtsıonaldyq qaıta jańǵyrtý kezeńine jol ashady. Bul memleket pen saıasattyń neǵurlym serpindi ári ashyq jańa modeline túpkilikti kóshýdi qamtamasyz etedi.
Buǵan deıin Erlan Qarın kópshilik aldynda adamdardy alalaý, óz pikirin qasaqana tyqpalaý ádeptilikke jatpaıtynyn aıtqan edi.
