Qarın Álemdik jáne dástúrli dinder lıderleri seziniń qyzmetine qatysty máseleler boıynsha keńes ótkizdi
ASTANA. KAZINFORM — Erlan Qarın Álemdik jáne dástúrli dinder lıderleri seziniń qyzmetine qatysty máseleler boıynsha keńes ótkizdi.
Vıtse-prezıdent Erlan Qarınniń tóraǵalyǵymen Sezdi odan ári damytý jáne halyqaralyq mádenı yntymaqtastyq máseleleri jóninde keńes ótti. Oǵan Prezıdent Ákimshiliginiń qurylymdyq bólimsheleri men salalyq memlekettik organdardyń basshylary qatysty.
Jıynda 2025 jylǵy Astana beıbitshilik deklaratsııasyn iske asyrýǵa aıryqsha nazar aýdaryldy. Qatysýshylar Hatshylyqtyń XXIV otyrysynyń qujattaryn, sonyń ishinde Din salasynda jasandy ıntellektini paıdalanýdyń etıkalyq kodeksin, klımattyń ózgerýine qarsy kúrestegi dinderdiń róli týraly qujatty jáne Jazylmaıtyn dertke shaldyqqan balanyń quqyqtary jónindegi hartııany halyqaralyq deńgeıde ilgeriletý máselesin talqylady.
Vıtse-Prezıdent Sezdiń halyqaralyq bedelin nyǵaıtý úshin aralyq kezeńde júıeli jumys júrgizýdiń mańyzyna toqtaldy. Erlan Qarınniń pikirinshe, Sezd ben Hatshylyq sheshimderin oryndaýǵa, sondaı-aq Sezd bastamalaryn ilgeriletý isine halyqaralyq seriktesterdi tartýǵa basa mán bergen jón.
Kún tártibine Hatshylyqtyń mereıtoılyq XXV otyrysyna jáne IX Sezge daıyndyq, sonyń ishinde Konfessııaaralyq jáne dinaralyq dıalog halyqaralyq ortalyǵynyń jumysyn jetildirý máseleleri shyǵaryldy.
Otyrys barysynda halyqaralyq mádenı yntymaqtastyqtyń jaı-japsary, atap aıtqanda, ISESKO-nyń «Túrkistan — ıslam áleminiń 2027 jylǵy mádenı astanasy» baǵdarlamasy aıasynda uıymdastyrylatyn is-sharalarǵa daıyndyq jáne Túrki órkenıeti ortalyǵyn qurý jaıy qaraldy. Sonymen qatar Damaskidegi Beıbarys sultan kesenesi men Ál-Farabı ortalyǵyna baılanysty máseleler qozǵaldy.
Keńes qorytyndysy boıynsha Vıtse-Prezıdent Sezd sheshimderin iske asyrý, aldaǵy is-sharalarǵa daıyndalý jáne vedomstvoaralyq koordınatsııany kúsheıtý jóninde birqatar tapsyrma berdi.