Qaraqat, Qymbat jáne Symbat: Atyraýda úshem dúnıege keldi

ATYRAÝ. KAZINFORM — Atyraý oblystyq perınataldyq ortalyǵynda 29 jastaǵy kelinshek 6 aqpan kúni úsh qyzdy dúnıege ákeldi. Búgin ana men kishkentaılar perzenthanadan shyqty. 

Oblystyq densaýlyq saqtaý basqarmasynyń málimetinshe, nárestelerdiń salmaǵy 1 keli 921 gramm, 2 keli 275 gramm jáne 2 keli 204 gramm. Boılary 44–45 santımetr aralyǵynda.

Buǵan deıin otbasynda bir ul jáne eki qyz tárbıelenip kelgen. Dárigerlerdiń aıtýynsha, qazirgi ýaqytta ana men balalardyń jaǵdaıy jaqsy.

— Basynda tań qaldyq. Keıin daıyndyqqa kiristik. Júktilik jeńil, jaqsy ótti. Balalarymnyń arasy 1 mınýttan. Olarǵa Qaraqat, Qymbat jáne Symbat degen esimder qoıdyq, — dedi kópbalaly ana Áselhan Keńesova.

Aıta keteıik, Atyraý oblysynda úshemderdiń dúnıege kelýi sırek kezdesedi. Sońǵy ret mundaı jaǵdaı 2024 jyly tirkelgen. Sol jyly eki otbasy osyndaı qýanyshqa kenelgen.

Budan buryn Shymkentte jyl basynan beri ekinshi úshem dúnıege kelgenin jazǵan edik.