Qaraqalpaqstanda Araldy zertteıtin ortalyq qurylady
ASTANA. KAZINFORM – Aral aımaǵynyń turaqty damýyna halyqaralyq qaýymdastyqty tartý maqsatynda Qaraqalpaqstannyń Moınaq qalasynda «Aral tabıǵatynyń zerthanasy» qurylady. Sondaı-aq, Araldaǵy ekologııalyq máseleler kórmesi men klımattyq tehnologııalardyń «Aral alqaby» kórmesin uıymdastyrý josparlanýda.
Ózbekstan Respýblıkasy Prezıdentiniń «2030 jylǵa deıin Aral óńirinde ekologııalyq ınnovatsııalar men klımattyq tehnologııalardy engizý jónindegi qosymsha sharalar týraly» sheshiminiń jobasy daıyndalǵan. Bul týraly memlekettegi Ekologııa, qorshaǵan ortany qorǵaý jáne klımattyń ózgerýi mınıstrligi habarlady.
Jobaǵa sáıkes, «Ekologııalyq kásipkerlikti» qoldaý maqsatynda jergilikti klımattyq erekshelikterge tózimdi ósimdik túrlerin ósirýge, eksportqa shyǵarylatyn ónimdi qaıta óńdeýge jáne óndirýge mamandandyrylǵan «Aral alqaby» klımattyq tehnologııalyq ekspo-habyn qurý josparlanýda.
Sonymen qatar, ekologııalyq ónimderdiń tuqymdary men kóshetteri plantatsııalaryn ósirý, ákelý jáne ornatý boıynsha startap jobalarynyń halyqaralyq irikteýin uıymdastyrý, jobalardy iske asyrý úshin jergilikti jáne sheteldik ınvestorlardy tartý, eksport boıynsha kásiporyndarǵa jeńildetilgen nesıeler belgileý jáne qoldaý josparlanýda.
Sonymen birge, Aral óńirindegi klımattyq turaqtylyqty qamtamasyz etý jáne ekologııalyq problemalarǵa arnalǵan Climate Expo kórmesin uıymdastyrý jáne halyqaralyq qaýymdastyqty Aral óńiriniń turaqty damýyna qatystyrý úshin Moınaq aýdanynda ashyq aspan astyndaǵy «Aral tabıǵaty zerthanasyn» qurý josparlanýda.
Aıta keteıik, QR Ekologııa jáne tabıǵı resýrstar mınıstrligi Aral aýmaǵynda ekologııalyq ahýaldy jaqsartý úshin 2025 jylǵa deıin 1,1 mıllıon gektar jerge sekseýil egý josparlanǵanyn málimdedi.
