Qaraǵandylyq velosıpedshi Qazaqstan rekordyn ornatty
QARAǴANDY. QazAqparat – Qaraǵandylyq velomarafonshy, aǵylshyn tili muǵalimi, jýrnalıst Ernat Melsuly as-sýsyz 109 shaqyrym joldy 7 saǵat 10 mınýtta eńserip, Qazaqstan rekordyn ornatty, dep habarlaıdy QazAqparat tilshisi.
Nátıjeni Qazaqstannyń rekordtar kitabynyń resmı ókili Qýandyq Qudaıbergenov tirkedi. Jaqyn arada arnaıy sertıfıkat tabystalady.
«Marafonshylar ádette jeńil jáne jyldam velosıped tańdaıdy, al Ernat taýda júretin aýyr velosıpedke otyrdy. Árıne, rekord moıyndaýǵa laıyq», - dep atap ótti Qýandyq Qudaıbergenov.
Velomarafon Nur-Sultan qalasynyń aınalma jolymen ótti. Jarys 11:47-de bastalyp, 19:28-de aıaqtaldy. Velosıpedshi Haziret Sultan meshitiniń aldyna kelip toqtady.
Ernattyń aıtýynsha, ol musylman qaýymy úshin qasıetti Ramazan aıynyń sońǵy 30-shy kúnine arnaıy velomarafon josparlaǵan. Jetistikti Qazaqstan halqynyń birligi kúnine de arnady.
«Velosherýden keıin ózimdi jaqsy sezinemin. Bolashaqta elimiz ben halqymyzdy dáripteýge úles qosý úshin álem boıynsha saıahattaǵym keledi. Tamyz aıynyń sońynda Ahmet Baıtursynov dúnıege kelgen Aqkól aýylynan Eýropaǵa halyqaralyq velojarys ótkizýdi josparlap otyrmyn. Baǵytty Batys Qazaqstan, Atyraý, Aqtaý, Ázerbaıjannyń astanasy Baký arqyly ótkizip, ıÝNESKO-nyń shtab-páteri ornalasqan Parıjde aıaqtaǵym keledi. Ahmet Baıtursynovtyń ómiri men shyǵarmashylyǵyn, qazaq halqynyń mádenıetin, sondaı-aq Abaıdyń «Tolyq adam» ıdeıasyn túrli qalalar men elderde kópshilikke taratqym keledi», - dedi Ernat Melsuly.
