Qaraǵandyda taǵy eki adamnan koronavırýs anyqtaldy
QARAǴANDY. QazAqparat - Búgin Qaraǵandyda koronavırýstyq ınfektsııa (COVID-19) taǵy eki adamda rastaldy. Olar Frantsııadan «Mınsk-Nursultan» reısimen 18 naýryzda ushyp kelgen. Eki áıel qonǵannan keıin birden karantınge jatqyzylǵan, dep habarlaıdy QazAqparat tilshisi.
«Patsıentterde vırýstyń bolýy zerthanalyq taldaýlar arqyly rastaldy. Qazirgi ýaqytta naýqastardyń jaǵdaıy qanaǵattanarlyq», - dep málimdedi Qaraǵandy oblystyq Densaýlyq saqtaý basqarmasynyń jetekshisi Erjan Nurlybaev onlaın-brıfıng barysynda.
Reıstiń qalǵan jolaýshylarynan 26 naýryzda koronavırýs belgileri tabylmady.
Medıtsınalyq personal sanıtarlyq qaýipsizdiktiń barlyq sharalaryn jáne qajetti hattamalardy saqtaýda.
Búgingi kúni karantınde 314 adam táýlik boıy baqylaýda. Bul 1A sanatyndaǵy elderden oralǵan nemese shartty túrde juqtyrǵan adamdarmen baılanysta bolǵan azamattar. Taǵy 152 adam úı jaǵdaıynda karantınnen ótýde.
Buǵan deıin Qaraǵandyda koronavırýstyq ınfektsııa juqtyrǵan eki adam anyqtalǵan bolatyn. Búgingi kúni olardyń jaǵdaıy qanaǵattanarlyq dep baǵalanady.
