Qaraǵandyda eki bala terezeden qulap ketti
QARAǴANDY. QazAqparat – Birinshi jaǵdaıda úsh jasar qyz bala zardap shekse, ekinshi oqys oqıǵada tórt jasar ul bala dene jaraqattaryn aldy. Ekeýi de aýrýhanaǵa jatqyzyldy, dep habarlaıdy QazAqparat tilshisi.
19 sáýirde tústen keıin tórt jasar bala kóp qabatty turǵyn úıdiń ekinshi qabatynyń terezesinen qulap ketti. Jazataıym oqıǵa Qaraǵandy qalasy Qurylysshylar dańǵylyndaǵy úıde oryn aldy. Aldyn ala málimetter boıynsha, bala eresekterdiń qaraýynsyz qalǵan. Zardap shekken búldirshin aýrýhanaǵa jatqyzyldy.
Osyǵan uqsas jaǵdaı 16 sáýirde de oryn aldy. 2019 jyly týǵan qyz bala Qaraǵandy qalasy Gogol kóshesindegi 5 qabatty turǵyn úıdiń 5-qabatynyń terezesinen qulap ketken.
«Qyz balanyń jaǵdaıy turaqty aýyr. Qazirgi ýaqytta ol jan saqtaý bóliminde. Al ekinshi qabattyń terezesinen qulaǵan tórt jasar balanyń jaǵdaıy ortasha aýyr, balalar travmasy bóliminde jatyr. Keshe jilinshik súıekteriniń ashyq synyǵyna operatsııa jasaldy», - dep habarlady Qaraǵandy oblysy Densaýlyq saqtaý basqarmasynyń baspasóz qyzmeti.
TJD qyzmetkerleri qulaý jaǵdaılarynyń kópshiligi ata-analar balalaryn qaraýsyz qaldyrǵan kezde oryn alatynyn eske salady.
