Qaraǵandyda 55 sport alańy salynady
QARAǴANDY. QazAqparat – Qazaqstanda 2025 jylǵa qaraı eldiń árbir ekinshi turǵyny sportpen shuǵyldanady dep boljanýda, dep habarlaıdy QazAqparat tilshisi.
Bul maqsatqa qalaı jetýge bolatyndyǵy QR Mádenıet jáne sport mınıstri Dáýren Abaevtyń tóraǵalyǵymen Qaraǵandyda kóshpeli jıynda aıtyldy. Bul basqosýǵa Qaraǵandy oblysynyń ákimi Jeńis Qasymbek, basqa oblystar men Nur-Sultan, Almaty, Shymkent qalalary ákimderiniń orynbasarlary jáne oblystardyń dene shynyqtyrý jáne sport basqarmalarynyń basshylary qatysty.
«Qaraǵandy el aımaqtaryndaǵy sport salasynyń jaı-kúıi men qajettilikterin zertteýdiń bastapqy núktesi bolyp tabylady. Bul jumys Memleket basshysynyń tapsyrmasy boıynsha júzege asyrylýda. Basty maqsat – otandyq sportty damytýdyń keshendi josparyn qalyptastyrý. Buqaralyq jáne balalar sportyn damytýdy erekshe atap ótý qajet. Taǵy bir basym baǵyt – aýyldyq bilim berý mekemelerin tarta otyryp, komandalyq sport túrlerinen ulttyq mektep jáne stýdenttik lıgalardy damytý», - dedi Dáýren Abaev.
Sport jáne dene shynyqtyrý isteri komıtetiniń tóraǵasy Samat Erǵalıev 2022 jyldyń mamyr aıynan bastap birqatar óńirlerde «Qoljetimdi sport» jobasyn júzege asyrý bastalatynyn aıtty. Atalmysh joba elordada óziniń tıimdiligin kórsetip úlgerdi.
«Buqaralyq sporttyń máni tek qamtýdy arttyrý emes ekenin bárimiz túsinemiz. Sport daryndaryn taýyp, damytý, talantty balalardan sport sheberlerin tárbıeleý, olarǵa barlyq jaǵdaı jasaý qajet. Ol úshin qalalar men aýyldyq jerlerde jańa nysandar salyp jatyrmyz. Biz nusqaýshylardy, jattyqtyrýshylardy daıyndaımyz, jarystar ótkizemiz. Múmkindigi shekteýli jandar úshin qoljetimdi ortany keńeıtip jatyrmyz», – dep atap ótti Jeńis Qasymbek.
Dene shynyqtyrý jáne sport basqarmasynyń basshysy Temirhan Abylaev Qaraǵandy oblysyndaǵy sporttyq rezervtiń daıyndyǵy týraly aıtty.
Oblysta sporttyń 100 túri damyp keledi, onyń 44-i olımpıadalyq. 456 myńnan astam adamdy qamtıtyn 1402 dene shynyqtyrý jáne sport uıymy bar. Joǵary oqý oryndarynda sport kadrlaryn daıarlaýǵa oblystyq bıýdjetten granttar bólinedi. Halyqaralyq jarystardyń jeńimpazdary men júldegerleri jáne olardyń jattyqtyrýshylaryna syıaqy, sondaı-aq aı saıynǵy járdemaqy beriledi.
Dene shynyqtyrý men sportty damytýdyń 2021-2025 jyldarǵa arnalǵan óńirlik jospary júzege asyrylýda. Bıyl tórt jańa dene shynyqtyrý-saýyqtyrý keshenin, eki júzý basseınin ashý, 55 sport alańyn ornatý josparlanýda.
Sondaı-aq jıynda respýblıkalyq monıtorıngtik toptyń óńirlerdegi jumysynyń qorytyndysy shyǵaryldy.
Dáýren Abaev jumys sapary barysynda Qaraǵandyda azamattardy qabyldaý ótkizdi. Sonymen qatar, mınıstr sport nysandarynyń qyzmetimen tanysty: «Atlant» keshenin, úlken jáne ústel tennısi ortalyqtaryn aralady.
