Qaraǵandy turǵyny kıeli Ulytaýǵa jaıaý attandy

QARAǴANDY. QazAqparat – Qaraǵandylyq prodıýser Ashat Qajytaı Ult uıasy - Ulytaýǵa deıin jaıaý marafonǵa attandy. 12 kún ishinde ol 777 shaqyrymdy eńserýge nıetti. Saıahatshy Ulytaý aýdanynda «Qaıyrymdy kılometr» qaıyrymdylyq aktsııasyn ótkizýdi josparlap otyr, dep habarlaıdy QazAqparat tilshisi.

Ashat Qajytaı óziniń «Jaıaý» joryǵyn el Táýelsizdiginiń 30 jyldyǵyna arnaıdy. Jol boıy ol áleýmettik jelilerde Saryarqanyń kórikti jerleri men kıeli nysandary týraly áńgimeleıdi. Osylaısha ol qyzyqty oryndar men adamdarǵa kópshiliktiń nazaryn aýdarǵysy keledi. Marafon aıaqtalǵannan keıin óziniń saıahaty týraly beıne esep shyǵarýǵa nıetti.

«Bul meniń alǵashqy jaıaý marafonym emes. Ótken jyly men óz komandammen birge Qaraǵandydan Aqsoranǵa deıingi 333 shaqyrymdy júrip óttim. Baqytymyzǵa oraı, bizde qonaqjaı adamdar jeterlik. Biz árqashan túneıtin oryn taýyp otyrdyq. Bul joly men Ulytaýdy tańdadym, sebebi ol óziniń týrıstik áleýetimen biregeı», – dep atap ótti Ashat Qajytaı.