Qaraǵandy oblysynyń eki aýylynda tasqyn sýdyń beti qaıtty
QARAǴANDY. QazAqparat - Qaraǵandy oblysyndaǵy Sadovoe jáne Chkalov aýyldarynda sý deńgeıi tómendedi, dep habarlaıdy «QazAqparat» HAA tilshisi.
«Buryn sý basqan Buqar jyraý aýdanynda Chkalov aýylynyń 34 úıi jáne Sadovoe aýylynyń 16 úıi sýdan tazartyldy», - dep habarlady óńirlik TJ deparatmentiniń baspasóz qyzmeti.
Tótenshe jaǵdaılardyń aldyn alý men kóktemgi sý tasqyny saldaryn joıý maqsatynda apattyq-qutqarý jáne shuǵyl jumystar jalǵasýda.
18 sáýir kúni óńir boıynsha 7 aýla aýmaǵynda sý deńgeıiniń kóterilýi baıqaldy. Onyń ishinde Abaı aýdany Ogorody aýylynda 1 úı, Tassýat aýylynda 2 aýla men 3 úı, Nura aýdany Zarechnoe aýylynda 2 aýla jáne Qarqaraly aýdany Jańa jol aýylynda 2 aýla men bir úı bar.
«Nura aýdany Tassýat aýylynan bir táýlikte 32 adam evakýatsııalanyp, týystarynyń úıine ornalastyryldy. 147 sıyr, 35 qoı men eshki, 7 jylqy, 221 shoshqa qaýipsiz jerge jetkizildi», - dep habarlady TJ boıynsha departamenttiń baspasóz qyzmeti.
Buǵan deıin Buqar jyraý aýdany Qyzyljar aýylynan evakýatsııalanǵan 267 adam óz úılerine oraldy.
Ótken táýlikte Nura aýdanynyń Tassýat jáne Zarechnoe eldi mekenderine 340 metrge sozylatyn 68 arnaıy qorǵanys kedergileri ornatyldy.
19 sáýirde oblystyń barlyq ózenderinde sý deńgeıiniń aıtarlyqtaı tómendegeni, sý qoımalaryndaǵy sýdyń azaıǵany baıqaldy. Balyqty temirjol stansasy aýdanyndaǵy Nura ózenderinde sý deńgeıi 18 sm, Besoba gıdrobeketinde - 20 sm, Sheshenqara gıdrobeketinde - 35sm, Sherýbaı-Nura aýdanyndaǵy Shopan gıdrobeketinde - 33 sm, Qaramuryn gıdrobeketinde - 37 sm, Úlken Qundyzdy ózenindegi Kıevka gıdrobeketinde - 65 sm, Qarakeńgir ózenindegi Malshybaı gıdrobeketinde - 40 sm tómendegen. Sondaı-aq, Toqyraýyn jáne Jaman Qon ózenderinde de sýdyń azaıýy tirkeldi.
