Qaraǵandy oblysynyń ákimi Cheh Elshisimen kezdesti
QARAǴANDY. QazAqparat - Qaraǵandyǵa QR-daǵy Cheh Respýblıkasynyń Tótenshe jáne Ókiletti Elshisi Rýdolf Gıkl keldi, dep habarlaıdy QazAqparat tilshisi.
Chehııa Respýblıkasynyń elshisi taý-ken jáne saýda-ekonomıkalyq saladaǵy yntymaqtastyq máselelerin talqylaý úshin oblys ákimi Erlan Qoshanovpen kezdesti.
«Men Qaraǵandy oblysy týraly mektep qabyrǵasynan beri bilemin. Munda alǵash ret jasóspirimder kezimde bolǵanmyn. Sizderdiń óńirlerińiz árdaıym iri ónerkásip ortalyǵy bolǵany esimde. Búgin menimen birge munda cheh kompanııalarynyń ókilderi keldi. Olar túrli salalarda, negizinen ónerkásipte, yntymaqtastyqty jolǵa qoıýdy josparlap otyr», - dedi Rýdolf Gıkl.
Cheh kásipkerleri taý-ken jabdyqtaryn óndirý men jetkizýge, aýyl sharýashylyǵy baılanystaryn nyǵaıtýǵa múddeli. Sondaı-aq Rýdolf Gıkl azamattyq avıatsııada yntymaqtastyqty jolǵa qoıýdy usyndy. Atap aıtqanda, Qaraǵandy oblysyna "Balapan" áýe mektebine arnalǵan ýltra jeńil ushaqtardy jetkizý máselesin qarastyrýdy surady. Bul usynystardy Qaraǵandy oblysynyń ákimi Erlan Qoshanov bolashaqta egjeı-tegjeıli qaraýǵa ýáde berdi.
«Oblysta Chehııa seriktesterimen birlesken 7 kásiporyn jumys isteıdi. Kóterme jáne bólshek saýda, elektrmen jabdyqtaý, qarjy jáne saqtandyrý qyzmeti jáne t.b. sııaqty salalarda bizdiń búgingi kezdesýimiz ekonomıkanyń túrli salalaryndaǵy jáne gýmanıtarlyq saladaǵy qarym-qatynastarymyzdyń odan ári damýyna serpin berer edi. Biz taý-ken metallýrgııa kesheni, mashına jasaý, tamaq ónerkásibi jáne aýyl sharýashylyǵy sııaqty salalarda taýasha jobalardy usynýǵa, sondaı-aq sizdermen aldaǵy seriktestik qarym-qatynastardy talqylaýǵa daıynbyz», - dep atap ótti oblys ákimi.
Qaraǵandyǵa elshimen birge 10 cheh kompanııasynyń ókilderi keldi. Olar jergilikti kásipkerlermen kezdesýdi josparlap otyr.
«Bizde EEA-daǵy ónerkásip óndirisiniń 90%-y Cheh óndirýshilerine qyzyǵýshylyq tanyta alady. Jyl saıyn Chehııadan Qazaqstanǵa 450 mln dollarǵa qural-jabdyqtar jetkiziledi. Cheh kompanııalaryna óndiristi osynda, jergilikti jerde ashýdy usyný oryndy dep oılaımyz. Sebebi bizdiń iri kásiporyndar Cheh Respýblıkasynan jabdyqtardi iri kólemde satyp alady», - dedi oblys ákiminiń orynbasary Almas Aıdarov.
