Álemdegi zamanaýı memlekettiń úlgileri úlken synaqtan ótip jatyr - Baımenov
ASTANA. KAZINFORM – Qazir álemdegi halyqaralyq qarym-qatynas erejeleri úlken synaqtan ótip jatyr. Bul týraly «Jibek Joly» telearnasynyń «Ýáde» baǵdarlamasyna suhbat bergen Astana memlekettik qyzmet haby basqarý komıtetiniń tóraǵasy Álıhan Baımenov aıtty.
Suhbat barysynda «Memlekettik organ – ol halyqqa qyzmet kórsetetin servıs pe álde buıryq beretin jabyq kasta bolýy kerek pe?» degen suraq qoıyldy. Á.Baımenov bul suraq jalpy jahan úshin ózekti ekenin aıtty.
- Qazir tek Ekinshi Dúnıejúzilik soǵystan keıin qalyptasqan halyqaralyq qarym-qatynas erejeleri, halyqaralyq saýda qaǵıdalary ǵana emes, zamanaýı memlekettiń úlgileri de úlken synaqtan ótip jatyr. Bul – demokratııanyń ózine de úlken synaq. Osy turǵydan alǵanda, memlekettik qyzmet pen memlekettik apparat - ol uzaq merzimdi memlekettiń múddesin qorǵaý úshin jumys isteýi kerek pe álde bir saılaýdan kelesi saılaýǵa deıin óziniń aldyna qoıǵan maqsattary bar saıası qyzmetshilerdiń múddesin qorǵaý úshin jumys isteýi tıis pe? Bul dılemma qazirgi álemdegi memlekettik basqarý júıesi damýynda óte ózekti. «Saıasatker kelesi saılaýdy oılasa, memleket qaıratkeri – keler urpaqty oılaıdy» degen sóz bar. Saılaý arqyly jeńiske jetken partııalardyń barlyǵy birdeı keler urpaqty oılaı bermeıdi. Sondaı-aq saılaý arqyly jeńiske jetken laýazym ıeleriniń keıbirine mundaı qabilet berilmegen, - dedi Álıhan Baımenov.
Budan bólek ol memlekettik qyzmettegi kásibı mamandarǵa qatysty pikir aıtty.
- Saıası memlekettik qyzmetshi - senimniń negizinde taǵaıyndalatyn adam. Mınıstrdi taǵaıyndaý aldynda ony emtıhannan eshkim ótkizbeıdi. Ondaı tájirıbe álemde joq. Biraq onyń qaramaǵyndaǵy kásibı mamandar mınıstrge durys keńes berip otyrýy kerek, sonymen qatar onyń qabyldaǵan árbir sheshiminiń saldary qalaı bolatynyn aldyn ala boljap aıtýy tıis, - dedi Astana memlekettik qyzmet haby basqarý komıtetiniń tóraǵasy.
Buǵan deıin habarlanǵandaı, Álıhan Baımenov Termınkom músheleri qandaı shet tilderin bilýi kerektigin aıtty.
