Qaraǵandy oblysynda elorda kúnderi bastaldy

ASTANA. QazAqparat - Búgin Astananyń 20 jyldyǵyna oraı Qaraǵandy oblysynda elorda kúnderi bastaldy, dep habarlaıdy QazAqparat. Elordanyń Mádenıet jáne sport basqarmasynyń málimetinshe, astanalyq shyǵarmashylyq ujymdar ázirlegen baǵdarlama tosyn syılarǵa toly ári qyzyqty bolady. Kórmeler, kontsertter, Open Air jáne tsırk shoýy ótkiziledi.

Ónerpazdar «Gornıak» mádenıet saraıynyń sahnasynda óner kórsetedi. 21 maýsymda saǵat 15.00-de foıede «Aq tilekpen, Astana!» atty kórmeniń ashylýy ótedi. Elimizdiń jartysyn aralap shyqqan ekspozıtsııada 50 otandyq sýretshiniń 100-den asa eńbegi kópshilik nazaryna usynylady.

Gastroldiń birinshi kúni Qaraǵandy turǵyndary «Astanadan aq tilek...» atty gala-kontsertti tamashalaıdy. «Shalqyma» halyq bıi ansambli, estradalyq bı ansambli klassıkalyq, estradalyq jáne halyq vokalynyń solısteri, sonymen qatar Astana qalasynyń Memlekettik akademııalyq fılarmonııasynyń qazaq orkestri elordadan mýzykalyq sálem jetkizedi. Kesh qonaqtaryna taǵy da bir tartý jasalady - sahnada Qaırat Nurtas, Klara Tólenbaeva, Asqar Jaılaýbaev, Kúláıym Qaıyrbaeva, Di-ArtStyle trıosy, Adam, Indıra Rasylhan, Almas Kishkenbaev, Qaırat Baekenov jáne «Format» toby óz ánderin shyrqaıdy.

Kontserttiń bastalýy saǵat 17.00-de.

Al birneshe saǵattan keıin 20:00-de Qaraǵandanyń Ortalyq saıabaǵynda ashyq aspan astynda «Astanadan aq tilek...» Open Air kontserti ótedi. Buǵan deıin gala-kontsertte óner kórsetken tanymal artısterge Dos, «Suraya» dýeti, Rınat Maltsagov jáne elordalyq dıdjeıler qosylady. Bul kúni qaraǵandylyqtardyń kóńil-kúıi kóterińki bolmaq.

Kelesi kúni «Naz» memlekettik bı teatry «Elimniń júregi - Astana!» baǵdarlamasyn kórermender nazaryna usynady. Artıster qazaq halqynyń dástúrli bıiniń náziktigi men ásemdigin jetkizetin ózderiniń úzdik horeografııalyq kompozıtsııalaryn oryndaıdy. Al keremet mýzyka, ashyq kórkemdik dekoratsııalar men ádemi kostıýmder kontsertti kóriktendire túspek. 

Budan basqa, astanalyq tsırk «S lıýbovıý, Astana!» baǵdarlamasyn qoıady. Eki kún boıy qaraǵandylyq tsırk kúmbeziniń astynda áýe gımnasttary, sıgveıdegi ekvılıbrıstter, úıretilgen ańdar, ıllıýzıonıstter, sondaı-aq kóńildi saıqymazaqtar óner kórsetetin bolady. Shoý saǵat 16.00-de bastalady.

Aıta keteıik, elordalyq shyǵarmashylyq ujymdar óńirlerde ótkizgen barlyq sharalar tegin jáne olardy bári de kóre alady.

Astana qaraǵandylyqtar úshin mádenı baǵdarlamadan basqa sporttyq sharalar da ótkizbek. Sportqa áýes jandar gandboldan  2001 jylǵa deıin jáne sol jyly týǵan jasóspirimder arasyndaǵy matchtyq kezdesýlerdi tamashalaı alady. Týrnır 22 maýsymda saǵat 10.00-de bastalady. Jarysqa 12 sportshydan quralǵan, jattyqtyrýshylary men bir ókili bar komandalar qatysady. Oıynshylar men jeńimpazdar dıplomdarmen jáne gramotalarmen marapattalady.