Qaraǵandyda esirtki taratqan sheteldikter ustaldy

ASTANA. KAZINFORM – Qaraǵandyda «Qarasora – 2025» jedel is-sharasy barysynda esirtki taratqan sheteldikter ustaldy, – dep jazdy Polisia.kz.

Qaraǵandy qalasynda «Qarasora – 2025» respýblıkalyq jedel aldyn alý is-sharasy aıasynda esirtki qylmysyna qarsy is-qımyl tobynyń qyzmetkerleri iri operatsııa ótkizdi. Nátıjesinde esirtki taratqan eki shetel azamaty ustaldy.

Operatsııa kezinde 29 jáne 39 jastaǵy er adam qala kósheleriniń birinde qolǵa tústi. Tintý barysynda úlkeninen árqaısysy shamamen 0,5 gramm bolatyn quramynda A-PVP bolýy múmkin 11 túıinshek, sondaı-aq qosymsha 0,5 jáne 1 gramdyq 11 túıinshek tabylyp, tárkilendi. Al ekinshi kúdiktiden telefon tekserý kezinde kýratormen jazysqan hattar men esirtki jasyrylǵan oryndardyń fotosýretteri anyqtaldy.

Kórsetilgen mekenjaılarǵa tekserý júrgizý nátıjesinde quramynda uqsas zat bar 16 túıinshek tabyldy.

Aıta keteıik, bıyl 9 aıda esirtkini jasyryn taratýmen aınalysqan 61 jasóspirim ustaldy.