Qaraǵandyda dropperlikpen aınalysqan eki stýdentke úkim shyqty

ASTANA. KAZINFORM – 2025 jylǵy 16 qyrkúıekten bastap QR Qylmystyq kodeksine dropperlik úshin qylmystyq jaýapkershilik kózdeıtin 232-1-bap engizildi.

Dropperlik – azamattardyń úshinshi tulǵalarǵa ózderiniń banktik shotyna, tólem kartasyna nemese sáıkestendirý quraldaryna zańsyz qoljetimdilik berýi, sondaı-aq olardy aqshalaı syıaqy ne ózge de múliktik paıda úshin paıdalanýǵa usynýy.

Qazirgi tańda dropperlik ınternet-alaıaqtyq shemalarynyń negizgi tetikteriniń birine aınalǵan. Dropperlerdiń shottary arqyly qylmyskerler urlanǵan qarajatty qolma-qol aqshaǵa aınaldyryp, ıemdenedi.

- Qaraǵandy qalasynyń Qazybek bı atyndaǵy aýdan prokýratýrasy Qylmystyq kodekstiń 232-1-baby 1-bóligi boıynsha qylmystyq teris qylyq jasaǵan eki tulǵaǵa qatysty memlekettik aıyptaýdy qoldady.

Sottalýshylar aqshalaı syıaqy úshin óz banktik shottaryn úshinshi tulǵalarǵa bergen stýdentter bolyp shyqty. Sot otyrysynda olar kinálaryn tolyq moıyndap, jasaǵan áreketterine ókinetinderin bildirdi. Kiná usynylǵan dáleldemeler jıyntyǵymen tolyq rastaldy, - dep jazdy qadaǵalaýshy organnan.

Іsti qaraý qorytyndysy boıynsha sot aıyptalýshylardy kináli dep tanyp, aıyppul túrindegi jaza taǵaıyndady. Úkim zańdy kúshine engen joq.

Prokýratýra eskertedi: banktik kartalardy, shottardy jáne jeke derekterdi bógde adamdarǵa «ýaqytsha» nemese «qosymsha tabys tabý úshin» berý qylmystyq jaýapkershilikke ákep soǵady.

Aıta keteıik, buǵan deıin kıberpolıtseıler birneshe alaıaqtyq shemaǵa qatysy bar dropperdi ustady.