Qaraǵandyda aıaǵy aýyr kópbalaly analar esirtki satqan

QARAǴANDY. KAZINFORM — Qaraǵandyda esirtki taratýmen aınalysqan 53 adam ustalǵan. Onyń ishinde eki júkti áıel, stýdentter men oqýshylar bar. 

Keshki Qaraǵandy arnasynyń habarlaýynsha, polıtseıler esirtki bıznesimen kúresti jalǵastyryp jatyr. Qazir qylmyskerler ınternetti jaqsy meńgergen, onda olar azamattarǵa ońaı tabys usynady. 

Qaraǵandy oblysy polıtsııa departamenti bastyǵynyń orynbasary, polkovnık Ábil Ábildınniń aıtýynsha, jyl basynan beri aqparattyq resýrstar arqyly esirtki satqandarǵa 71 qylmystyq is qozǵalǵan.

Onyń ishinde 40-y — graffıtı arqyly jarnamalaǵandar. 

Esirtki taratýǵa qatysqan 53 adam ustaldy, onyń ishinde ál-aýqaty jaqsy eki júkti, kópbalaly áıel, tórt stýdent jáne kámeletke tolmaǵan 8 bala bar. 

Eki áıeldiń biri 2 kelige jýyq sıntetıkalyq esirtkini osynda jetkizgeen, ekinshisi — kópbalaly ana ony qala boıynsha taratqan. Ekeýi de 8-10 jyl merzimge sottaldy.   

Qazirgi ýaqytta eriktiler men polıtsııa esirtki jarnamasy bar 10 000-ǵa jýyq graffıtıdi boıady.

Polkovnık Ábildın graffıtı arqyly jarnama jasaǵandar 3 jyldan 6 jylǵa deıin bas bostandyǵynan aıyrylatynyn atap ótti.