Qaraǵandy oblysyndaǵy kentte mal qyryldy
QARAǴANDY. KAZINFORM - Qaraǵandy oblysynyń Shahtınsk qalasyna qarasty Dolınka kentinde 100-den astam qoıdyń qyrylǵan. Aldyn ala boljam boıynsha mal ýlanǵan bolýy múmkin.
Áleýmettik jelilerde taraǵan beınejazbada dalada jatqan mal ólekseleri kórsetilgen. Kadrlar eldi eleń etkizdi. Qoı ıeleri bolǵan jaǵdaıǵa alańdaýly, al jergilikti bılik oqıǵaǵa qatysty alǵashqy túsinikteme berdi.
— Qyrylǵan maldyń barlyǵy bir jerden sý ishken. Aldyn ala derekterge sáıkes, dál osy sýdan ýlanǵan bolýy yqtımal. Qazir zerthanalyq zertteý jumystary júrip jatyr, — delingen Shahtınsk qalasy ákimdiginiń resmı habarlamasynda.
Abaı aýdanyna qarasty Jartas aýylynyń shekarasy, Dolınka kentimen irgeles jatqan jerden 105 bas maldyń óleksesi tabyldy.
Jergilikti ákimdik qazirgi tańda epızootııalyq jaǵdaı turaqty ekenin, mal arasynda asa qaýipti juqpaly aýrýlar joq ekenin habarlady.
— Oblystyq veterınarııalyq qyzmet mamandary ýlanýdyń jalpy osyndaı jaǵdaılardyń aldyn alý baǵytynda keshendi jumys júrgizip jatyr. Jaǵdaı baqylaýda, — delingen ákimdik málimdemesinde.
Aıta keteıik, buǵan deıin Qazaqstanda aýyl sharýashylyǵy janýarlarynyń jaǵdaıyn onlaın baqylaýǵa múmkindik beretin arnaıy smart-júıe engizilgeni habarlanǵan bolatyn. Bul júıe maldyń densaýlyǵyn der kezinde baqylaýǵa, ólim-jitim men aýrý belgilerin erte anyqtaýǵa múmkindik beredi.