Qaraǵandy oblysynda ınkassator kóligi otqa orandy
QARAǴANDY. KAZINFORM — Qaraǵandy mańyndaǵy tas jolda ınkassatorlyq kólik pen jeńil avtokólik qatyǵysyp, saldarynan ınkassator birer sátte otqa oranyp, júrgizýshisi qaza boldy. Qujattalǵan úsh mıllıon teńgeden astam qarajat túgelimen janyp ketti, al apatqa sebepker bolǵan júrgizýshi qamaýǵa alyndy.
Qaıǵyly oqıǵa «Qarqaraly–Qaraǵaıly» avtojolynda bolǵan. Oblystyq polıtsııanyń málimetinshe, Toyota Camry júrgizýshisi rólge ıe bola almaı, ınkassatorlyq Lada Largus kóligimen qatty soqtyǵysqan. Soqqynyń saldarynan ınkassator kóliginiń 28 jastaǵy júrgizýshisi oqıǵa ornynda kóz jumdy. Onyń 36 jastaǵy áriptesi jáne Camry avtokóliginiń 41 jastaǵy júrgizýshisi medıtsınalyq mekemege jetkizilgen.
Apat faktisi boıynsha qylmystyq is qozǵaldy. Camry tizgindegen er adam ustalyp, ýaqytsha ustaý ızolıatoryna qamaldy. Tergeý barysynda onyń mas kúıde bolǵany jáne bir jyl buryn júrgizýshi kýáliginen aıyrylǵany anyqtaldy.
Inkassatorlyq kólikte úsh mıllıon teńgeden astam qarajat bolǵan. Qatty soqqydan keıin tutanǵan órt aqshany da, kólikti de tolyqtaı joıǵan.
Qazirgi ýaqytta tergeý amaldary júrgizilip jatyr. Polıtsııa qyzmetkerleri júrgizýshilerdi jol qozǵalysy erejelerin muqııat saqtaýǵa shaqyryp, mas kúıinde rýlge otyrýdyń qaıǵyly saldaryna taǵy bir márte nazar aýdartty.
Eske salsaq, Lısakovskide júrgizýshiniń polıtsııadan qashyp qutylýǵa tyrysqan áreketi qaıǵyly jaǵdaımen aıaqtaldy. Qaýipti manevrler jasaǵan júrgizýshi jaryq baǵanasyna soǵylǵannan keıin qaza tapty.