Qaraǵandy oblysynda eldiń úzdik qusbegileri anyqtaldy
ASTANA. KAZINFORM – Qaraǵandy oblysy Buqar Jyraý aýdany Botaqara kentinde jasóspirimder men jastar arasynda ańshy qustarmen ań aýlaý boıynsha Qazaqstan chempıonaty ótti, dep habarlaıdy oblys ákimdiginiń baspasóz qyzmeti.
Eń myqty búrkitshi ataǵy úshin elimizdiń 11 oblysynan, Astana men Almatydan 60 sportshy baq synasty.
Jarysqa olar 40 búrkit, 17 qarshyǵa jáne 9 suńqar alyp keldi.
Ańshylar qustardy qolyna tartý, ań aýlaý jáne olja izdeý kezinde olardy baǵyttaý qabiletimen jarysty.
Qaraǵandy oblysynan óner kórsetken Qazbek Jandaýlet búrkitpen ań aýlaýda úshinshi boldy. Birinshi jáne ekinshi oryndardy Jambyl jáne Almaty oblystarynyń ókilderi ıelendi.
Bir búrkitshige birden belgili bir sanattaǵy birneshe túrli qustarmen óner kórsetýge ruqsat etildi.
Aqmola oblysynan Darhan Keńes búrkit pen de suńqarmen de jarysqa qatysty.
— Meniń úlken aǵam aldymen dástúrli ań aýlaýdy bastady. Men de birte-birte qyzyǵýshylyq tanytyp, onymen birge jattyǵýdy bastadym. Bizde suńqarlar da, búrkitter de bar. Ýaqyt bolsa, ártúrli qustarmen jumys isteýdi úırenýge bolady, — deıdi ol.
Chempıonatta Darhan suńqarymen ekinshi oryn aldy. Ol sondaı-aq búrkittermen ań aýlaıtyn fınalısterdiń qataryna kirdi, biraq bul sanatta júldeli oryn alǵan joq.
— Dástúrli ań aýlaýda kóptegen faktorlar ról atqarýy múmkin. Bul aýa raıy, jer bederi, qysym, qustyń kóńil-kúıi. Barlyǵy árqashan búrkittiń sheberligi men tájirıbesine baılanysty bola bermeıdi, degenmen olar da sheshýshi ról atqarady. Mende áli kóp tájirıbe joq: ádette meniń aǵam jarysqa barady, Men úıde qustardy baqylap otyramyn. Biraq ótken jyly Kókshetaýdaǵy jarystarda búrkitpen úshinshi orynǵa ıe boldym, — dedi Darhan Keńes.
Suńqar aýlaýda birinshi orynda Almaty oblysynyń ókili, al úshinshi orynda — elorda turǵyny boldy.
Túrkistan, Jambyl jáne Almaty oblystarynyń qatysýshylary suńqarmen ań aýlaýda úzdik atandy.
Jeńimpazdar men júldegerlerge 500, 300 jáne 200 myń teńgege aqshalaı sertıfıkattar tabystaldy.
Buǵan deıin Almaty oblysynda «Sonar-2024» halyqaralyq qusbegiler týrnıri ótkenin jazdyq.
