Qaraǵandy aınalma joly aqyly bolady
ASTANA. KAZINFORM – Qaraǵandy aınalma avtomobıl jolynda aqy alý júıesi engiziledi. Bul jaıynda Kólik mınıstriniń Ashyq NQA portalynda jarııalanǵan buıryǵynda aıtylǵan.
Qujatqa sáıkes, uzyndyǵy 48 shaqyrym aqyly avtomobıl jolmen júrip ótý úshin tólem mólsherlemeleri kólikterdiń sanatyna qaraı mynadaı soma bolmaq:
- jeńil kólikter úshin aldyn ala tólem jasalǵanda 260 teńgeni, keıinnen tólem jasalǵanda 300 teńge;
- 16 orynǵa deıingi avtobýstar jáne júk kótergishtigi 2,5 tonnaǵa (budan ári – tn) deıin júk avtomobılderi úshin aldyn ala tólem jasalǵanda 650 teńgeni, keıinnen tólengende 760 teńge;
- 32 orynǵa deıingi avtobýstar jáne júk kótergishtigi 5,5 tonnaǵa deıin júk avtomobılderi úshin aldyn ala tólem jasalǵanda 1 280 teńge, keıinnen tólengende 1 500 teńge;
- 32 orynnan asatyn avtobýstar jáne júk kótergishtigi 10 tonnaǵa deıin avtopoezdar úshin aldyn ala tólem jasalǵanda 1 910 teńge, keıinnen tólengende 2 250 teńge;
- júk kótergishtigi 10 tonnadan joǵary 15 tonnaǵa deıingi júk avtomobılderi úshin aldyn ala tólem jasalǵanda 2 570 teńge, keıinnen tólengende 3 020 teńge;
- júk kótergishtigi 15 tonnadan joǵary, onyń ishinde tirkelgish jáne ershikti tartqyshtar úshin aldyn ala tólem jasalǵanda 3 200 teńge, keıinnen tólengende 3 760 teńge bolady.
Avtokólik quralynyń túrine jáne júk kótergishtigine baılanysty jergilikti avtokólik úshin 1 aılyq jáne 1 jyldyq abonementter qarastyrylǵan. Atap aıtqanda:
- jeńil kólikter úshin 1 aılyq abonement qarastyrylmaǵan, al 1 jylǵa 3 692 teńge;
- 16 orynǵa deıingi avtobýstar jáne júk kótergishtigi 2,5 tonnaǵa (budan ári – tn) deıin júk avtomobılderi úshin 1 aıǵa 7 384 teńge, 1 jylǵa 73 840 teńge;
- 32 orynǵa deıingi avtobýstar jáne júk kótergishtigi 5,5 tonnaǵa deıin júk avtomobılderi úshin 1 aıǵa 14 768 teńge, 1 jylǵa 147 680 teńge;
- 32 orynnan asatyn avtobýstar jáne júk kótergishtigi 10 tonnaǵa deıin avtopoezdar úshin 1 aıǵa 22 152 teńge, 1 jylǵa 221 520 teńge;
- júk kótergishtigi 10 tonnadan joǵary 15 tonnaǵa deıingi júk avtomobılderi úshin 1 aıǵa 29 536 teńge, 1 jylǵa 295 360 teńge;
- júk kótergishtigi 15 tonnadan joǵary, onyń ishinde tirkelgish jáne ershikti tartqyshtar úshin 1 aıǵa 36 920 teńge, 1 jylǵa 369 200 teńge bolady.
Aıta keteıik, Qaraǵandy aınalma jolyn aqyly negizde paıdalaný merzimi 20 jyl dep belgilenbek. Buıryq jobasy 9 qyrkúıekke deıin qoǵamdyq talqylaýǵa shyǵarylyp otyr.
Buǵan deıin Antıkordyń aralasýynan keıin «Qaraǵandy-Balqash» avtojolyn qaıta jańartý kezinde anyqtalǵan aqaýlar joıylǵanyn jazǵan bolatynbyz.
