«Qapshaǵaı bıdaı ónimderi»: Qytaıǵa alǵashqy ónim eksporttalady
ASTANA. KAZINFORM - Aýyl sharýashylyǵy mınıstri Aıdarbek Saparov Almaty oblysyna jumys sapary barysynda «Qapshaǵaı Bıdaı ónimderi» dándi daqyldardy óńdeý keshenin tolyq qaıta jańǵyrtýǵa baǵyttalǵan iri ınvestıtsııalyq joba barysymen tanysty.
Quny 12 mlrd teńgeden asatyn joba (2024–2026 jj.) bir mezette 100 myń tonna astyq saqtaıtyn elevatordy jańǵyrtýdy, táýligine 400 tonna shıkizat óńdeıtin maısyǵý zaýytyn, táýligine 2 500 tonna astyq óńdeıtin quramajem zaýytyn jáne táýligine 300 tonna ónim shyǵaratyn un kombınatyn qamtıdy.
Qazirgi ýaqytta elevatordy jańǵyrtý jáne 1000 konteınerge arnalǵan termınal qurylysy aıaqtalýǵa jaqyn, sondaı-aq quramajem zaýytynyń birinshi kezeńi iske qosylýda. 6,5 myń sharshy metr qoımalar salyndy, uzyndyǵy 5,9 shaqyrym bolatyn temirjol joldary jańartyldy.
Aýyl sharýashylyǵy mınıstrligi málimetinshe, qazir un tartý jáne maı óńdeý tsehtarynyń jabdyqtary ornatylyp jatyr. Keshen tolyq jobalyq qýatyn ıgergennen keıin jylyna 840 myń tonna quramajem, 59 myń tonna joǵary surypty un, 31 myń tonna bıdaı kebegi, 54,6 myń tonna ósimdik maıy, 61,6 myń tonna kúnjara, 17,5 myń tonna túıirshiktelgen qaýyz óndiriletin bolady.
– Qapshaǵaı Bıdaı ónimderi» jobasy – qaıta óńdeý qýattaryn jańǵyrtý men eksportty ulǵaıtýdyń aýyl sharýashylyǵyn jáne jalpy el ekonomıkasyn damytýǵa qalaı yqpal etetininiń jarqyn dáleli. Qytaıǵa alǵashqy ónim toptamasyn jóneltý Qazaqstannyń agroónerkásiptik kesheniniń joǵary áleýetiniń aıqyn kórsetkishi. Biz el ishinde qaıta óńdeýdi arttyryp, qosylǵan qun qalyptastyratyn jobalardy árdaıym qoldaıtyn bolamyz, – dep atap ótti mınıstr.
Joba Qazaqstannyń eksporttyq áleýetin arttyrý turǵysynan aıryqsha mańyzdy. Qazirdiń ózinde «Qapshaǵaı Bıdaı ónimderi» seriktestiginde Qytaıǵa jóneltiletin alǵashqy ónim legi daıyn.
Bul QHR-men saýda-ekonomıkalyq yntymaqtastyqty arttyrýdaǵy mańyzdy qadamdardyń biri. Jalpy aldaǵy bes jyl ishinde kompanııa jaqyn shetelderge 2 mln tonnadan astam aýyl sharýashylyǵy ónimin eksporttaýdy josparlap otyr.
Aıta keteıik, Qytaı Qazaqstan unyn kóptep satyp ala bastady.