Qandaı jaǵdaıda medıtsınalyq qyzmetkerdi úıge shaqyrýǵa bolady

PETROPAVL. KAZINFORM — Bes jasqa deıingi balalarǵa, júkti jáne bosanǵan áıelderge densaýlyǵy syr bergen jaǵdaıda medıtsınalyq qyzmetkerler úıge kelip qyzmet kórsetýge mindetti.

Medıtsınalyq kómekti úı jaǵdaıynda alýǵa taǵy kimder quqyly? Bul jaıynda «Áleýmettik medıtsınalyq saqtandyrý qory» KEAQ Soltústik Qazaqstan oblystyq fılıalynda aıtyp berdi. 

Jasy 65-ten asqandar da júris-turysy qıyndaǵan jaǵdaıda mamandy úıge shaqyra alady.

Sondaı-aq ýchaskelik medbıke nemese feldsher: 

— shaqyrý kezinde syrqattyń dene temperatýrasy 38°C bolsa;
— jaǵdaıynyń qatty nasharlaýynsyz qan qysymynyń joǵarylaýynda;
— medıtsınalyq kómekti jáne úıde konsýltatsııany qajet etetin jaı-kúıler, aýrýlar, jaraqattar (esin joǵaltpaı, qan ketý belgileri joq, jaı-kúıiniń kenetten nasharlaýy bolmaǵanda) úıge kelip, qyzmet kórsetedi.

Al ýchaskelik dárigerdi úıge:

— shaqyrýdy qabyldaý kezinde emhana tirkeýshisi, ýchaskelik medbıke nemese úıde dárigerlik qaraýdy talap etetin shaqyrýǵa qyzmet kórsetken feldsher baǵalaǵan jaǵdaıda;
— vaktsınatsııadan keıingi jaǵdaı nasharlaǵanda shaqyrýǵa bolady.

Buǵan deıin Qazaqstanda kimderge plastıkalyq ota tegin jasalatyndyǵyn jazǵan edik.