Qandaı bankter ıpoteka berýdi ýaqytsha toqtatty
ASTANA. KAZINFORM – Qazaqstandaǵy keıbir bankter qaıtalama naryqtan baspana satyp alýǵa arnalǵan ıpotekalyq nesıeler boıynsha ótinish qabyldaýdy ýaqytsha toqtatty.
Eske sala ketsek, Qazaqstanda ıpoteka boıynsha jyldyq tıimdi syıaqy mólsherlemesi 25%-dan 20%-ǵa tómendetildi. Tıisti túzetý Qarjy naryǵyn retteý jáne damytý agenttigi men Ulttyq banktiń birlesken qaýlysyna engizilgen. Jańa talap 15 maýsymda kúshine endi.
Búgin Kazinform tilshisi bankterge qońyraý shalyp, Halyk Bank, TsentrKredıt banki men Nurbank qaıtalama turǵyn úı naryǵyna qatysty ıpotekalyq ótinish qabyldaýdy ýaqytsha toqtatqanyn anyqtady.
Operatorlardyń aıtýynsha, qazir bul bankterde tehnıkalyq jumystar júrgizilip, jańa mólsherlemeler engizilip jatyr.
Sonymen birge, Altyn Bank pen Freedom Bank ıpotekalyq ótinishterdi qalypty tártipte qabyldap, qarastyryp jatqanyn habarlady.
Aıta keteıik, jyl basynan beri ıpotekalyq baǵdarlamalar boıynsha 11 myńnan astam nesıe berildi.