Kanadada 5 mln ara kóshege tarady
LONDON. QazAqparat – Ontarıo shtaty, Berlıngton qalasyndaǵy kóshelerdiń birinde sársenbi kúni tańerteń aralar qaptap ketken, dep habarlaıdy QazAqparat BBC-ge silteme jasap.
Belgili bolǵandaı, 5 mıllıon ara tıelgen jáshikter júk kóliginen qulap túsken. Aralardy qystaý úshin Mılton qalasyna apara jatqan.
Tri-City Bee Rescue omarta kompanııasynyń ıesi Maıkl Barberdiń aıtýynsha, eńbek etip kele jatqan 11 jylda ol mundaıdy kórmegen.
Omartalardy ustap turǵan baýlar bosap ketip, jáshikter jolǵa qulaǵan jáne zaqymdalǵan.
Júrgizýshilerge tereze ashpaý buıyryldy, al jaıaý júrginshilerge oqıǵa ornyna alysyraq júrý eskertildi. Áleýmettik jeliler arqyly polıtsııa azamattardy osy aımaqqa jaqyndamaýǵa shaqyrdy.
M.Barber polıtsııadan habarlama alǵannan keıin, ol basqa omartashylardan qosymsha kómek surady. Jalpy alǵanda, ondaǵan omartashy ara ustaý operatsııasyna qatysty. M.Barber keıinirek habarlaǵandaı, aralar men olardyń uıalary 400 metr aýmaqqa jaıylǵan. Jaqyn mańdaǵy mashınalar men poshta beketterinde jas aralar jınalǵan, onyń aıtýynsha, olar qaýipsiz oryn izdegen kezde osylaı jasaıdy. Birneshe saǵattan keıin aralardyń kópshiligi óz uıalaryn tapqan, biraq birneshe júz ara apattan qyrylǵan.
Málim bolǵandaı, júk kóliginiń júrgizýshisin aralar 100 ret shaqqan, óıtkeni onyń omartashy kostıými bolmaǵan. Jaqyn jerde jedel járdem dárigerleri bolǵandyqtan ol aýyr zardaptan aman qalǵan.
