Kadetter emtıhan tapsyrýǵa kiristi

ASTANA. 4 maýsym. QazAqparat - Búgin Qorǵanys mınıstrliginiń Shoqan Ýálıhanov atyndaǵy Kadet korpýsynda bitirý emtıhandary bastaldy. Bıyl Kadet korpýsyn 200-den astam kadet támamdap shyqpaq. Eki jyl boıy osy oqý ornynda bilim alǵan jas jigitter memlekettik attestattaý komıssııasyna qol jetkizgen kásibı biliktilikterin kórsetedi. Olardyń otyzdan astamy úzdik dıplomǵa qol jetkizedi degen nyq senim bar.

«Atys jáne taktıkalyq daıarlyq boıynsha memlekettik emtıhandar ótkizý úshin Kadet korpýsynyń oqý-jattyǵý ortalyǵy daıyndaldy. Qarý-jaraq pen áskerı tehnıkanyń qurylysy, ony jóndeý men paıdalaný boıynsha emtıhan zerthana ǵımaratynda, sondaı-aq dene daıarlyǵy boıynsha sport bazasynda ótkiziledi. Bıyl Kadet korpýsynan 15 bitirýshiler toby qanat qaǵady. Qurylǵannan beri bul oqý ornyn 1800-den astam kásipqoı serjant bitirip shyǵyp, áskerlerimizdiń sapynda abyroımen qyzmet atqarýda»,-delingen QR Qorǵanys mınıstrligi baspasóz qyzmetiniń málimetinde.

QR Qorǵanys mınıstrliginiń Shoqan Ýálıhanov atyndaǵy Kadet korpýsy Qazaqstan Respýblıkasy Prezıdentiniń Jarlyǵymen 1996 jylǵy shilde aıynda qurylǵan. Osy oqý ornynyń qabyrǵasynan 1999 jyly bitirip shyqqan alǵashqy túlekterdiń biri - sheber-serjant Temirbek Halyqov búginde Qarýly Kúshterdiń Bas serjanty. Kadet korpýsynyń ózge de túlekteri áskerı joǵary laýazymdarda qyzmet atqarýda.

Qazirgi sátte Qazaqstan Qarýly Kúshteri kásipqoı serjanttar ınstıtýtyn engizý boıynsha aldyńǵy qatardan oryn alady. Kadet korpýsyn qurý jáne qalyptastyrý jónindegi Qazaqstannyń tájirıbesin TMD memleketteriniń qarýly kúshteri zerdeleýde. Osy maqsatta Kadet korpýsyna Armenııanyń Reseıdiń, Ýkraınanyń, Belarýstiń jáne basqa da elderdiń áskerı delegatsııalary jıi kelip turady.

«Kásipqoı serjant» túsinigin bizdi bitirýshiler is júzinde dáleldeýde. Olar jaýyngerlik daıarlyq boıynsha joǵary nátıjelerge qol jetkizip, motoatqyshtar atys qarýynyń barlyq túrinen ata biledi, árqashan «jaqsy» jáne «úzdik» degen baǵalarǵa ıe bolady, qarýdy kózin jumyp bólshektep, qaıta jınaý olarǵa esh qıyndyq týǵyzbaıdy. Bizdiń túlekterimiz áskerlerdegi áskerı tehnıkany paıdalaný men jóndeýde, atys jáne taktıkalyq daıarlyq kezinde úzdik nátıjeler kórsetýde»,-deıdi Kadet korpýsynyń bastyǵy podpolkovnık Talǵat Baýdınov.

Oqýdy aıaqtaǵan kadetter «Áskerı basqarý» mamandyǵy boıynsha «áskerı basqarýdyń kishi mamany - menedjer», «V. S. sanattarynyń júrgizýshisi», «Jaýyngerlik mashınanyń úshinshi synypty júrgizýshisi» biliktilikterin alyp shyǵady.

Oqý úderisinde kadetter aǵylshyn tilin tereńdetip meńgerip, áskerge kelip túskende sheteldik áskerı qyzmetshiler qatysatyn halyqaralyq oqý-jattyǵýlarda tildik qıynshylyqqa kezikpeıdi.

Bir ýaqytta Kadet korpýsynda 500-ge jýyq kadet bilim alady. 2014 jyldan bastap oqýshylar sanyn eki esege kóbeıtý josparlanǵan, bul Qarýly Kúshterdiń daıarlanǵan kásipqoı serjanttarǵa qajettiligin tolyq qamtamasyz etedi.

Jyldan jylǵa Kadet korpýsyna túsýge tilek bildirgender sany artyp keledi. Qazirgi ýaqytta qabyldaý konkýrsy bir orynǵa 3 adamdy quraıdy. Bul rette talapkerlerge densaýlyq jaǵdaıy boıynsha qatań talap qoıylady. Qabyldanǵanǵa deıin kadetter úsh ret medıtsınalyq komıssııadan ótedi.