Izraıl Beırýttegi «Hezbolla» nysandaryna soqqy jasady

ASTANA. KAZINFORM — TsAHAL málimetinshe, soqqy drondar óndirisine baǵyttalǵan, dep habarlaıdy Euronews. 

Izraıl áskeri Beırýttiń ońtústigindegi birneshe nysanǵa áýe soqqysyn jasady. Olardyń aıtýynsha, bul nysandar «Hezbollanyń» radıkaldy shııttik qozǵalysyna qarasty «127-otrıad» dep atalatyn áýe kúshteri paıdalanatyn jerasty qurylystary bolǵan. Bul qurylymdar drondar óndirýge arnalǵan.

Soqqylar beısenbi kúni keshki saǵat 22:00–den keıin bastaldy. TsAHAL (Izraıl qorǵanys armııasy) bul soqqylarǵa qatysty pikir bildirdi.

— Qozǵalystyń áýe bólimshesi Irandaǵy terrorıstik sheneýnikterdiń basshylyǵy jáne qarjylandyrýymen myńdaǵan ushqyshsyz ushaq (BPLA) shyǵarýmen aınalysyp jatyr, — dep málimdedi.

TsAHAL bul áreketti Izraıl men Lıvan arasyndaǵy kelisimderdi óreskel buzý dep baǵalap, «Hezbolla» Lıvan memleketine qaýip tóndirip, kelisimderdiń oryndalýyna kedergi keltirip otyr» dep atap ótti.

Izraıl tarapy AQSh-tyń araǵaıyndyǵymen jasalǵan atysty toqtatý týraly kelisimnen keıingi bul soqqylar «Hezbollanyń» qaıta toptasýyna jol bermeý maqsatynda jasalyp jatqanyn málimdedi.

Lıvan armııasy bul soqqylardy aıyptap, olardyń atysty toqtatý sharttarynyń oryndalýyn baqylaýdaǵy rólin álsiretetinin aıtyp, eger jaǵdaı ózgermese, atysty baqylaý jónindegi komıtetpen yntymaqtastyqty toqtatýy múmkin ekenin eskertti.

Beısenbi kúni Lıvan premer-mınıstri Navaf Salam qyzmetke kiriskenine 100 kún tolýyna oraı jasaǵan teleúndeýinde Lıvan qarýly kúshteri eldiń ońtústiginde «Hezbolla» sodyrlaryna tıesili 500-den astam áskerı nysan men qarý-jaraq qoımasyn joıǵanyn habarlady.

Aıta keteıik, aqpan aıynda Lıvannyń jańa úkimeti parlamentten senim mandatyn alǵan edi. Bul úkimet «Hezbolla» blogynyń qoldaýyna ıe bolǵan.

Aıta ketelik Izraıl TsAHAL-dyń jańa qolbasshysyn taǵaıyndaǵan edi.