Italııada álemdegi eń úlken aspaly kópir salynady

ASTANA. KAZINFORM — Italııa úkimeti Sıtsılııa men Kalabrııa óńirleriniń oqshaýlaný máselesin sheshýge baǵyttalǵan, álemdegi eń úlken aspaly kópir jobasyn júzege asyrýǵa nıetti ekenin málimdedi, dep habarlaıdy AZƏRTAC. 

Jobanyń boljamdy quny – 13,5 mıllıard eýro, al kópirdiń negizgi aralyǵy – 3,3 shaqyrym bolmaq. Bul kórsetkishpen ol álemdegi eń uzyn aspaly kópir atanýy múmkin. Joba 150 jyldan beri talqylanyp keledi, alaıda naqty iske asýy áli kúnge deıin bastalmaǵan. Kópirdiń josparlanǵan orny – ınjenerlik turǵyda kúrdeli aımaq sanalatyn Messın buǵazy. Munda saǵatyna 100 shaqyrymǵa deıin jetetin jel soǵyp turady, seısmıkalyq belsendilik te joǵary.

Italııanyń ınfraqurylym mınıstri Matteo Salvını jańa tehnologııalar arqyly osy qaýipterdi eńserýge bolatynyn aıtyp otyr. Onyń aıtýynsha, joba sátti aıaqtalsa, bul Italııanyń kólik baılanysynda naǵyz «revolıýtsııa» bolady.

Úkimettiń boljamynsha, Sıtsılııa men Kalabrııanyń materıkten oqshaýlanýy Italııa ekonomıkasyna jyl saıyn 6,5 mıllıard eýroǵa shyǵyn keltiredi. Sonymen qatar, joba 120 myń jumys ornyn ashýy múmkin. Alaıda táýelsiz sarapshylar naqty jumys oryndarynyń sany jylyna 2–3 myńnan aspaýy múmkin ekenin aıtady.

Ekologtar jobanyń teńiz ekojúıesi men qustardyń kóshý joldaryna qaýip tóndiretinin eskertip otyr. Al «No Ponte» qozǵalysynyń belsendileri bul bastamany Italııanyń ońtústigindegi ınfraqurylym, densaýlyq saqtaý jáne bilim berý máseleleri sheshilmeı turǵan kezde – bosqa ketetin qarajat dep sanaıdy.

Mınıstr Salvınıdiń aıtýynsha, eger premer-mınıstr Djordjııa Melonı basqaratyn úkimet aıdyń sońyna deıin jobany resmı túrde bekitse, bul Eýropadaǵy eń aýqymdy qurylys bastamalarynyń biri bolmaq.

Degenmen tarıh bul baǵytta abaı bolýdy úıretedi: osyǵan deıingi 12 talpynystyń barlyǵy keıinge shegerilip, keıbiri múldem toqtatylǵan, onyń ishinde 2012 jylǵy qaryz daǵdarysy kezindegi joba da bar. 

Prezıdent Qazaqstan-Italııa strategııalyq seriktestigi barlyq baǵytta serpindi damyp otyr degen edi.