Ystyq sý tarıfi 6,2% tómendedi: ınflıatsııa deńgeıi 11,8% qurady
ASTANA. KAZINFORM — 2025 jylǵy maýsymda jyldyq mánde ınflıatsııa deńgeıi 11,8% qurady. Bul týraly Ulttyq statıstıka bıýrosy málim etti.
2025 jylǵy maýsymda tutyný baǵalarynyń aılyq ındeksi baıaýlaı túsip, 0,8% qurady (2025 jylǵy mamyrda – 0,9%).
Azyq-túlik taýarlarynyń ishinde baǵa qııarǵa – 19,5%, qyryqqabatqa – 18,1%, qyzanaqqa – 15%, sarymsaqqa – 8,4%, bananǵa - 3,4%, jumyrtqaǵa 3% tómendegen. Osy oraıda balmuzdaq baǵasy 1,9% ósken, ıogýrt – 1,6%, jańǵaq – 1,5%, rýlet pen keksterge – 1,3%, kondıterlik ónimder men salqyndatylǵan sýsyndar – 1%-dan, sardelka baǵasy 0,9% qymbattaǵan.
Azyq-túlikke jatpaıtyn taýarlardyń ishinde maýsym aıynda turmystyq zattardan elektrli et tartqysh baǵasy 2,5%, útiktiki 1% ósken.
Stat bıýronyń dereginshe, tarıfter arasynan ystyq sý 6,2% tómendegen. Qyzmet kórsetý sektorynda baǵa fotograf qyzmetine 3,3% ósken, saltanatty sharalar ótkizetin uıymdastyrýshylarda – 2,8%, teledıdar jóndeý – 2,4%, turǵyn-úı, jaılardy jóndeý jáne qyzmet kórsetý – 1,4%, shashtarazdar men sulýlyq salondary qyzmetteri 1,3% joǵarylaǵan.
Jyldyq mánde qaraqumyq jarmasy – 9%, kúrish – 8,3%, qııar – 3,5%, suly jarmasy – 2,5%, keptirilgen órik 2,3% arzandady. Kerisinshe almurt – 11,3%, konservilengen júgeri – 10,8%, jemis jáne kókónis shyryndary 10,4% qymbattaǵan.
Azyq-túlik emes taýarlarynyń ishinde blender baǵasy 7,8% ósti.
2024 jylǵy maýsymmen salystyrǵanda ótken maýsym aıynda kabeldik televızııa qyzmetteri 2,2% joǵarylaǵan.
Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Baqylaýlar qyzmetter men taýarlardyń tarıfteri men baǵalary – barlyǵy 508 pozıtsııa boıynsha júrgiziledi. Inflıatsııa boıynsha dınamıkalyq ózgeristerdi 2018 jyldan bastap kórsetkishter qamtylǵan arnaıy ázirlengen ınteraktıvti dashbordta kórýge bolady.
Eske sala keteıik, Úkimet ınflıatsııany tejeý boıynsha keshendi is-sharalar ázirlegenin Parlament palatalarynyń birlesken otyrysynda Ulttyq bank tóraǵasy Tımýr Súleımenov aıtqan edi.