Ispanııada aptap ystyqtan 1060 adam qaza tapty

ASTANA. KAZINFORM – 2025 jyldyń shilde aıynda Ispanııada kún saıynǵy ólim-jitim monıtorıngi júıesiniń (MoMo) málimeti boıynsha aptap ystyqtan 1 060 adam qaıtys boldy, dep habarlaıdy Kazinform Euronews-ke silteme jasap. 

Bul kórsetkish 2024 jyldyń shilde aıymen salystyrǵanda 57%-ǵa jáne 2023 jyldyń sáıkes kezeńimen salystyrǵanda 54,5%-ǵa ósti. Jyl basynan beri joǵary temperatýradan 3 255 adam qaıtys boldy. Bul ótken jylǵy kórsetkishten (2 534 adam kóz jumǵan) aıtarlyqtaı joǵary. Al jaz áli bitken joq. 

– Pıreneı túbeginiń kóp bóliginde osy aptada jazdyń ekinshi aptap ystyq tolqyny bastalady degen boljam jasaldy. Ol kem degende kelesi jeksenbige deıin sozylady, - dep habarlaıdy Memlekettik meteorologııa agenttigi (Aemet). 

Joǵary temperatýra densaýlyqqa aıtarlyqtaı qaýip tóndiredi. Al tamyzdaǵy alǵashqy aptap ystyq tolqynynan dúısenbi kúni Badahosta 85 jastaǵy er adam qaıtys boldy. 

5 tamyz kúni Badahos nemese ıAen sııaqty aýdandarda temperatýra 42°C-qa jetýi múmkin. Atalǵan jaǵdaıǵa baılanysty 9 avtonomııalyq qaýymdastyqta sary nemese qyzǵylt sary dabyl deńgeıi jarııalandy. Іri qalalarda aýa temperatýrasy 38°C-qa deıin kóteriledi. Joǵary temperatýra tamyz aıynyń ortasyna deıin saqtalady. 

Eske salsaq, buǵan deıin Japonııada apta ishinde aptap ystyqtan 18 adam qaıtys bolǵanyn habarlaǵan edik.