ISAEV ORAZ JANUZAQULY

Isaev Oraz Januzaquly (1899-1938) - qoǵam jáne memleket qaıratkeri, saıası qýǵyn-súrgin qurbany. Burynǵy Oral oblysynyń Іlbishin ýezine qarasty Qarasý bolysynda (qazirgi Batys Qazaqstan oblysy) dúnıege kelgen.

Qarasýdaǵy 6-jyldyq orys-qazaq mektebinde oqyp, hat tanyǵan. Qoǵamdyq qyzmet jolyn 1916 jyly aýyl ákimshiliginde hatshy bolyp bastaıdy. 1917 jyly Shalqar bolysynda zemstvo basqarmasynyń hatshysy jáne ýezdik mılıtsııa hatshysy bolyp istegen.

1919-1920 jyldary Іlbishin jáne Jympıty ýezderinde quqyq qorǵaý organdarynda mılıtsııa hatshysy, erekshe tapsyrma bóliminiń jaýyngeri, gýbernııalyq tótenshe komıssııasynyń, birikken memlekettik saıası basqarmasynyń ýákili, gýbernııalyq qylmysty isterdi izdestirý organy bastyǵynyń orynbasary bolǵan. 1921 jyly bolshevıkter partııasy qataryna ótedi. Oral gýbernııasynda komsomol, kásipodaq uıymdaryn qurýǵa atsalysqan. 1924-1925 jyldary - Reseı Kommýnıstik (bolshevıkter) partııasy Qazaqstan ólkelik baqylaý komıssııasy tóraǵasynyń orynbasary, Qazaq Ortalyq atqarý komıtetiniń hatshysy. 1925-1929 jyldary - Búkilodaqtyq Kommýnıstik (bolshevıkter) partııasy Qazaqstan ólkelik komıtetiniń ekinshi hatshysy. 1929 jylǵy sáýirden 1938 jyldyń maýsymyna deıin Qazaqstan Halyq Komıssarlary Keńesiniń tóraǵasy qyzmetterin atqarǵan.

KSRO Búkilodaqtyq Ortalyq atqarý komıtetiniń jáne Ortalyq atqarý komıteti tóralqasynyń múshesi, ólkelik partııa komıtetiniń bıýro múshesi, KSRO Joǵarǵy Keńesiniń depýtaty jáne KSRO Joǵarǵy Keńesi Prezıdıýmynyń múshesi boldy.

Osy aralyqtarda, ıaǵnı 1926 jylǵy jaz aılarynda «Eńbekshi qazaq» gazetine de basshylyq jasady. Bul jóninde belgili ǵalym Temirbek Qojakeev «Egemen Qazaqstannyń» 1994 jylǵy 17 jeltoqsanda shyqqan sanyndaǵy «Gazettiń alǵashqy kerýenbasylary» atty maqalasynda bylaı dep jazady: «1926 jylǵy shildeniń 13-i men tamyzdyń 30-y aralyǵynda gazet redaktory Oraz Isaev boldy. Bul tusta ol Qazaq ólkelik komıtetiniń uıymdastyrý bólimin basqaratyn. Keıin on jyldaı Halyq komıssarlar keńesine tóraǵalyq etken isker de bedeldi qyzmetker bolǵan».

Oraz Isaev 1938 jyly jalǵan jalamen tutqyndalyp, saıası qýǵyn-súrginniń qurbany boldy. 1956 jyly tolyǵymen aqtalǵan.

1935 jyly Lenın ordenimen marapattalǵan.

Derek kózi:

Qazaqstan ulttyq entsıklopedııasy, 4 tom.