Irandyq áıel 11 kúıeýin ýlap óltirdi
ASTANA. Kazinform — Irannyń Mazandaran provıntsııasynda turatyn 56 jastaǵy Kolsým Akbarı esimdi áıel 22 jyl ishinde 11 kúıeýin ýlap óltirdi dep aıyptalyp, ólim jazasyna kesilýi múmkin, dep habarlaıdy Ary News.
Basylymnyń habarlaýynsha, tergeý barysynda ol aýqatty jáne jalǵyzbasty qarttarmen kezdesip, olarǵa iri kólemdegi mahr esesine turmysqa shyǵyp, keıin birte-birte ýlap óltirgenin moıyndaǵan. Áıel olardy ýlaý úshin qan qysymy men qant dıabetine qarsy preparattardy, tynyshtandyratyn dáriler men tehnıkalyq alkogol qospasyn qoldanǵan.
2000-2023 jyldar aralyǵynda Sary, Neka, Mahmýdabad, Babol jáne Qoıemshahr sııaqty birneshe qalalarda oryn alǵan qylmystardyń arasyndaǵy baılanysty anyqtaý qıyn boldy. Áıel óziniń sońǵy qurbany 82 jastaǵy Ǵulamrıza Babaı qaıtys bolǵannan keıin 2023 jyly qamaýǵa alynǵan. Marqumnyń tanysy onyń ákesin de ýlamaq bolǵanyn esine túsirip, polıtsııaǵa habarlasqan. Tergeý barysynda áıel kisi óltirgenin moıyndaǵanymen, naqty sanyn esine túsire almaǵan.
— Múmkin 13 nemese 15 adam bolǵan shyǵar, men naqty bilmeımin, — dedi ol.
Іste ol 11 kisi óltirý jáne 1 adam óltirýge oqtalý baby boıynsha aıyptalǵan. 45-ten astam talapker, sonyń ishinde jábirlenýshilerdiń muragerleri oǵan ólim jazasyn kesýdi surap otyr. Advokat áıelge psıhologııalyq saraptama júrgizýdi suraǵanymen, jábirlenýshilerdiń týystary mundaı muqııat josparlanǵan qylmystardy essizdikpen túsindirýge bolmaıtynyn aıtyp, buǵan qarsy boldy.
Prokýratýranyń málimetinshe, qaıtys bolǵan kúıeýlerden alynǵan múlikter Akbarıdiń qyzynyń atyna tirkelgen.
Eske sala keteıik, Ystambulda ózbekstandyq áıel kúıeýin pyshaqtap óltirgeni jaıly jazǵan edik.