Iranda prezıdent saılaýy bastaldy
ASTANA. KAZINFORM – Búgin, 28 maýsymda Iranda kezekten tys prezıdent saılaýy bastaldy. Bul týraly Tasnim aqparat agenttigi habarlady.
Eldiń joǵarǵy kóshbasshysy aıatolla Álı Hameneı saılaý protsesi bastalǵan boıda daýys berip, barsha ırandyqtardy saılaýǵa belsendi qatysýǵa shaqyrdy. Ol sondaı-aq daýys bergennen keıin Iran halqy úshin eń jaqsy kúnder men jyldar úshin duǵa etti. Saılaý kúnin ırandyqtar úshin «baqyt pen qýanysh kúni» dep sıpattaǵan Hameneı aldaǵy birneshe jyldaǵy eldiń taǵdyryn belgileıtin prezıdenttik saılaýǵa kelý bárinen de mańyzdy ekenin basa aıtty.
«Iran Islam Respýblıkasynyń álemde jalǵasýy, abyroıy, qadiri men qýaty halyqtyń bar bolýyna baılanysty», – dedi Hameneı.
El boıynsha saılaý ýchaskeleri jergilikti ýaqytpen tańǵy saǵat 8:00-de ashyldy jáne saılaý protsesi on saǵatqa sozylady. Biraq qajet bolǵan jaǵdaıda eldiń Іshki ister mınıstrligi saılaý merzimin uzarta alady. El ishinde jáne shetelde jalǵasyp jatqan saılaýǵa 61 mıllıon 450 myńnan astam ırandyq saılaýshy qatysa alady. 2006 jyldyń 28 maýsymynda nemese odan buryn týǵan ırandyq daýys berýge quqyly.
Respýblıka boıynsha 59 myńǵa jýyq saılaý ýchaskesi, onyń ishinde 15 myńnan astam jyljymaly ýchaskeler qurylǵan. Sheteldegi Iran azamattarynyń qatysýy úshin 100 elde barlyǵy 340 saılaý ýchaskesi jumys istep jatyr.
Saılaý mamyr aıynda Iran prezıdenti Ibragım Raısıdiń qaıtys bolýyna baılanysty merziminen bir jyl buryn ótkizilip jatyr. 1979 jyly Islam revolıýtsııasynyń jeńisinen bergi 14-shi jańa ákimshilik maýsym aıynyń aıaǵynda nemese shildeniń basynda bılikke kelip, tórt jyl qyzmet etedi.
Aıta keteıik, Iran Prezıdenti ákimshiliginiń basshysy Rolam Hýseın Esmaılı el Prezıdenti Raısı mingen tikushaqpen qatarlasa ushqan áýe kemesinde bolǵan. Ol qaıǵyly oqıǵaǵa qatysty tyń mán-jaıdy aıtyp bergen edi.
