Iranda áýe taksıi iske qosyldy

ASTANA. KAZINFORM – IRNA habarlaǵandaı, Iranda el tarıhyndaǵy alǵashqy áýe taksıi resmı túrde iske qosyldy.

Saltanatty sharaǵa prezıdent qatysyp, beıneúndeý joldady.

Alǵashqy reıs Keredj ben Kazvın qalalaryn baılanystyryp, turaqty jolaýshylar tasymalynyń bastalǵanyn bildirdi.

— Áýe taksıiniń iske qosylýy – úlken bolashaǵy bar mańyzdy jetistik, — dedi Irannyń kólik mınıstriniń keńesshisi jáne «Paıam» arnaıy ekonomıkalyq aımaǵy men halyqaralyq áýejaıynyń bas dırektory Mohsen Hasanlý.

Onyń aıtýynsha, bul jańa kólik túri Paıam arnaıy ekonomıkalyq aımaǵyna ınvestıtsııalar tartýǵa, ulttyq ekonomıkany jandandyrýǵa jáne Alborz provıntsııasynyń damýyna serpin beredi. Sonymen qatar, halyq úshin avıatsııa qyzmetterin keńinen paıdalanýǵa qolaıly jaǵdaı jasaıdy.

— Áýe taksıi az júkteletin áýe baǵyttaryn jandandyrýda mańyzdy ról atqarady, — dep atap ótti Hasanlý.

Ol bul qyzmetti «ınnovatsııalyq sheshim» dep baǵalap, halyqtyń áýe tasymalyna qol jetkizýine jáne ınvestorlar úshin jańa múmkindikterdiń ashylýyna jol ashatynyn aıtty.

Mamandardyń aıtýynsha, Iranda alǵashqy áýe taksıiniń iske qosylýy – eldiń kólik ınfraqurylymyn jańǵyrtý men avıatsııa qyzmetteriniń qoljetimdiligin keńeıtý jolyndaǵy eleýli qadam.

Buǵan deıin 2028 jylǵy Olımpıadada Los-Andjeleste áýe taksı qyzmeti josparlanyp otyrǵanyn jazǵanbyz.