Iran ýrandy baıytý quqyǵy talqylaýǵa jatpaıtynyn málimdedi

ASTANA. KAZINFORM – Iran men AQSh kelissóziniń kelesi raýndy aldaǵy senbide Italııa astanasynda ótedi, dep habarlaıdy Kazinform menshikti tilshisi.

Irannyń ýrandy baıytý quqyǵy talqylaýǵa jatpaıdy, dep málimdedi sársenbi kúni Syrtqy ister mınıstri Abbas Arakchı osy demalys kúnderi Rımde ótetin Tegerannyń ıadrolyq baǵdarlamasy boıynsha AQSh-pen kelissózdiń ekinshi raýndy aldynda.

Arakchı seısenbide AQSh-tyń bas kelissóz júrgizýshisi Stıv Ýıtkoftyń Tegeran Vashıngtonmen kelisimge kelý úshin «ıadrolyq baıytý men jappaı qyryp-joıatyn qarý baǵdarlamasyn toqtatyp, joıý kerek» degen pikirine jaýap berdi.

- Biz Ýıtkoftyń qarama-qaıshy málimdemelerin estidik, biraq naqty ustanymdar kelissóz ústelinde naqtylanady, - dedi Arakchı.

- Biz Irannyń baıytýǵa (ýrandy) qatysty yqtımal alańdaýshylyqtarǵa qatysty senim ornatýǵa daıynbyz, biraq baıytý prıntsıpi talqylanbaıdy, - dep atap ótti Iran SІM basshysy.

Sońǵy ýaqytqa deıin ıadrolyq kelissózdiń ekinshi raýndy ótetin jer týraly qarama-qaıshy aqparat aıtylyp kelgen. Osy arada Iran sársenbi kúni kelissózdiń kelesi raýndy 19 sáýir, senbi kúni Rımde ótetinin rastady. Bul rette Oman kelissózge taǵy deldal bolady.

Atom energııasy jónindegi halyqaralyq agenttiktiń (MAGATE) basshysy Rafael Grossı sársenbi kúni Le Monde gazetine bergen suhbatynda Irannyń ıadrolyq bomba jasaýdan «alshaq emes» ekenin málimdedi. Bul málimdeme MAGATE basshysy joǵary laýazymdy tulǵalarmen kelissóz ótkizgen Tehranǵa kelýden birneshe saǵat buryn jasaldy.

Budan basqa, Qurama Shtattar bir kún buryn Iranǵa qatysty sanktsııalyq baǵdarlama aıasynda júk tasymaldaý kompanııalary men munaı tankerlerine jańa sanktsııalar engizdi. Bul týraly AQSh Qarjy mınıstrligi habarlady.

Kelissóz AQSh pen Irannyń arasynda sońǵysynyń ıadrolyq baǵdarlamasy aıasynda shıelenis kúsheıýine baılanysty ótip jatyr.

AQSh prezıdenti Donald Tramp eger kelisimge qol jetkizilmese, Irannyń ıadrolyq baǵdarlamasyna áýeden soqqy beremiz dep birneshe ret qorqytqan bolatyn. 

The New York Times habarlaýynsha, Tramp Izraıldiń ırandyq ıadrolyq nysandaryna mamyr aıyna josparlaǵan shabýylynan bas tartyp, onyń ıadrolyq baǵdarlamasyn shekteý úshin Iranmen kelissóz júrgizýdi qoldady.

Gazettiń málimetinshe, Tramp Izraıl premer-mınıstri Benıamın Netanıahýǵa premer osy aıdyń basynda Aq úıge barǵan kezde mundaı shabýyldy qoldamaý týraly sheshimin habarlady.

Eske sala ketsek, dúısenbi kúni Frantsııa Syrtqy ister mınıstri Jan-Noel Barro AQSh pen Iran kelissózi eýropalyq múddelerge saı bolýy tıis ekenin málimdedi.

AQSh-tyń syrtqy saıasaty aıasynda Qazaqstandaǵy ýran baǵasy tómendedi.