Iran Tramptyń ıadrolyq kelissózder týraly hatyn aldy
ASTANA. KAZINFORM - Irannyń rýhanı kósemi Álı Hameneı buǵan asa qyzyǵýshylyq tanytpaıtynyn bildirdi.
Tegeran AQSh prezıdenti Donald Tramptan Irannyń ıadrolyq baǵdarlamasy boıynsha kelissóz júrgizýdi suraǵan resmı hat aldy. Hatty sársenbi kúni keshke Tegeranǵa kelgen Birikken Arab Ámirlikteri prezıdentiniń dıplomatııalyq keńesshisi Anvar Gargash Iran Syrtqy ister mınıstri Abbas Arakchıge tapsyrdy.
Arakchı sársenbi kúni keshke Tegerandaǵy Iran Syrtqy ister mınıstrliginde Gargashty qabyldaǵannan keıin birneshe saǵat ótken soń óziniń Instagram paraqshasynda hatty alǵanyn rastady, dep habarlaıdy IRNA.
Aıta keteıik, 7 naýryzda Tramp Fox Business Network arnasyna bergen suhbatynda Iran kóshbasshysy Álı Hameneıge hat joldaǵanyn aıtqan bolatyn.
- Kelissóz júrgizýge kelisesiz dep úmittenemin, óıtkeni áskerı jolmen soǵysýymyz kerek bolsa, bunyń saldary óte aýyr bolady, - dedi Tramp.
Birer kún buryn Iran Syrtqy ister mınıstri Abbas Arakchı Tramptyń hatyn arab memleketiniń arnaıy ókili jaqyn kúnderi jetkizetinin aıtqan bolatyn. Al Irannyń rýhanı kósemi aıatolla Álı Hameneı sársenbi kúni AQSh-pen kelissózder júrgizýden bas tartty. Hameneı ýnıversıtet stýdentteri aldynda sóılegen sózinde Tramptyń kelissózder týraly usynysyn «aldaý» dep baǵalady.
– Biz bulardyń kelissóz erejesin oryndamaıtynyn bilip tursaq, kelissózdiń ne keregi bar? Sondyqtan kelissózge shaqyrý... qoǵamdyq pikir arqyly aldaý, dep habarlaıdy ırandyq BAQ Hameneıdiń sózin.
Aıatolla shamadan tys talaptar qoıyp otyrǵan Tramp ákimshiligimen kelissózder «sanktsııalar túıinin qataıtyp, Iranǵa qysymdy kúsheıtetinin» aıtty.
2018 jyly Tramp AQSh-ty Irannyń ıadrolyq baǵdarlamasyna qatysty «ıAdrolyq kelisim» dep atalatyn ortaq jan-jaqty is-qımyl josparynan (JCPOA) alyp tastap, Iran ekonomıkasyn álsiretetin sanktsııalardy qaıta engizdi.
2019 jyly Tramp aıatolla Hameneımen tikeleı kelissózder júrgizýge tyrysyp, Japonııa premer-mınıstri Sındzo Abeni arashalaýǵa shaqyrdy. Budan keıin Irannyń joǵarǵy jetekshisi de bul usynysty ashyq túrde qabyldamady jáne «Tramp habarlama almasatyn adam emes» dedi.
Hameneı sondaı-aq Iranǵa keletin kez kelgen áskerı soqqydan saqtanýǵa nazar aýdardy.
- Iran soǵys izdemeıdi, biraq amerıkalyqtar nemese olardyń agentteri qate qadam jasasa, bizdiń jaýabymyz sheshýshi ári naqty bolady jáne Amerıka kóp zardap shegedi, - dedi.
– Eger biz ıadrolyq qarý jasaǵymyz kelse, AQSh oǵan tosqaýyl bola almas edi. Biz muny ózimiz qalamaımyz, - dedi aıatolla.
8 naýryzda Hameneı AQSh máselelerdi kelissózder arqyly sheshkisi kelmeıtinin, biraq óz talaptaryn qoıyp, ústemdik ornatqysy keletinin aıtyp, Irannyń buǵan kelispeıtinin atap ótti.
Al Qytaı, Iran jáne Reseı Syrtqy ister mınıstrlikteriniń ókilderi jaqyn arada Beıjińde Irannyń ıadrolyq máselesin talqylaıdy.