Iran Ormýz buǵazynyń áli de jabyq ekenin málimdedi

ASTANA. KAZINFORM - Islam revolıýtsııasy saqshylary korpýsy Ormýz buǵazy arqyly ruqsatsyz ótetin kemeler joıylatynyn eskertti. Buǵazdy ashý AQSh pen Iran arasyndaǵy bitimniń negizgi sharttarynyń biri sanalady, dep habarlaıdy BBC.

Brıtandyq SSY kompanııasy BBC Verify jýrnalısterine Parsy shyǵanaǵyndaǵy kemelerge joldanǵan habarlamany rastady.

- Nazar aýdaryńyzdar, Parsy shyǵanaǵy men Oman teńizindegi barlyq kemeler. Bul — Iran áskerı-teńiz kúshteriniń habar taratý stansasy. Ormýz buǵazy áli de jabyq, buǵazdan ótý úshin Islam revolıýtsııasy saqshylary korpýsynan ruqsat alý qajet. Teńizge shyǵýǵa árekettengen kez kelgen keme shabýylǵa ushyrap, joıylady, - delingen onda.

SSY ókili Kler Grıersonnyń aıtýynsha, keme ekıpajdary bul habarlamany halyqaralyq teńizdik eskertý jıiligi arqyly qabyldaǵan.

Sársenbi kúni buǵaz arqyly eki munaı tankeri ótken, alaıda keıin Iran medıasynyń habarlaýynsha, qozǵalys qaıta toqtatylǵan. Bul jaǵdaı Izraıldiń Lıvanǵa qarsy júrip jatqan shabýyldarymen baılanystyrylyp otyr.

AQSh pen Izraıldiń bitim boıynsha kelisimi Lıvanǵa qatysty emes ekenin málimdese, Iran bıligi kerisinshe pikir bildirip, soqqylardy toqtatýdy talap etip otyr.

Sońǵy málimet boıynsha, Lıvan Densaýlyq saqtaý mınıstrliginiń deregine sáıkes, jappaı shabýyldar saldarynan keminde 112 adam qaza taýyp, 837 adam jaralanǵan.

Osyǵan deıin Izraıl Iranǵa shabýyldaryn toqtatqanymen Lıvandaǵy operatsııalaryn jalǵastyryp otyrǵany týraly jazdyq.