Iran Ormýz buǵazynda kemeler úshin balama baǵyttar engizdi

ASTANA. KAZINFORM — Munaıdyń negizgi baǵyty arqyly qozǵalys atysty eki aptaǵa toqtatý jarııalanǵannan keıin de qalpyna kelgen joq, dep habarlaıdy Kazinform agenttiginiń Taıaý Shyǵystaǵy menshikti tilshisi. 

Kpler, Lloyd’s List Intelligence jáne Signal Ocean keme qatynasy qyzmetteriniń málimetinshe, sońǵy táýlik ishinde Ormýz buǵazy arqyly tek bir munaı tankeri men bes júk tasymaldaıtyn keme ótken, dep habarlady beısenbide Reuters.

Bul rette 28 aqpanda qaqtyǵys bastalǵanǵa deıin buǵaz arqyly kúnine orta eseppen 140-qa jýyq keme ótetin. Osylaısha, AQSh pen Iran arasynda atysty toqtatý týraly kelisimnen keıin de trafık mınımaldy bolyp qalyp otyr.

BAÁ-niń ADNOC memlekettik munaı kompanııasynyń basshysy Sultan ál-Djaber beısenbi kúni buǵaz jabyq kúıinde qalyp otyrǵanyn jáne oǵan kirý Iran baqylaıtyn sharttarǵa baǵynatynyn málimdedi.

— Bul keme qatynasy erkindigi emes, qysym jasaý quraly, — dep atap ótti ol.

Osy arada TASS agenttiginiń joǵary laýazymdy derekkózge silteme jasap habarlaǵanyndaı, Tegeran keme ótkizýdi kúnine 15 kemeden aspaıtyndaı shekteýdi, sol arqyly keme qatynasyn baqylaýdy tıimdi túrde saqtap qalýdy kózdep otyr.

NATO-nyń bas hatshysy Mark Rıýtte beısenbi kúni odaqtastaryna AQSh prezıdenti Donald Tramp aldaǵy kúnderi buǵazdaǵy keme qatynasy qaýipsizdigin qamtamasyz etýge qatysý úshin naqty mindettemeler kútetinin habarlady, dep jazady Reuters.

Eni shamamen 34 shaqyrymdy quraıtyn Ormýz buǵazy Parsy shyǵanaǵyn Úndi muhıtymen baılanystyryp, munaıdyń álemdik jetkiziliminiń shamamen besten bir bóligin qamtamasyz etip otyr. Aqpan aıynyń sońynan beri onyń is júzinde jabylýy álemdik energetıkalyq baǵalardyń ósýiniń negizgi faktory boldy.

Osy arada Irannyń ISNA agenttiginiń habarlaýynsha, Irannyń Islam revolıýtsııa saqshylary korpýsy tranzıttik kemelerge teńiz mınalarynan aýlaq bolýǵa kómektesýge arnalǵan Ormýz buǵazyndaǵy balama keme qatynasy joldarynyń kartasyn jarııalady.

IRSK Áskerı-teńiz kúshteri kartada «qaýipti aımaq» retinde belgilengen áskerı-teńiz mınalarynan aýlaq bolý úshin kemeler óz joldaryn Iran jaǵymen úılestirýi kerek dep málimdedi. Buryn tankerler buǵazdyń ońtústik bóligindegi Oman jaǵalaýyna jaqyn jerde tranzıtpen júretin, biraq qazir olarǵa soltústik baǵytta — Iran jaǵalaýyna jaqyn jerde júrýge keńes berildi.

Endi Ormýz buǵazynan ótýdi josparlap otyrǵan barlyq keme mınalarǵa tap bolmaý úshin Tegeran usynǵan eki balama baǵytty ustanýy kerek.

Osyǵan deıin Iran Izraıldiń Lıvanǵa jasaǵan soqqylarynan soń Ormýz buǵazyn qaıta japqanyn habarlaǵan edik.