Iran kásipkerleri Mańǵystaýda mal bordaqylaýǵa daıyn
SARI. KAZINFORM - Iran Islam Respýblıkasyna issaparmen barǵan mańǵystaýlyq delegatsııa Mazandaran provıntsııasyndaǵy aýyl sharýashylyǵy ónimderi jáne balyq sharýashylyqtarynyń jumysymen tanysty.
Atap aıtqanda, aýyl sharýashylyǵy ónimderin eksportqa shyǵaryp otyrǵan iri kásiporynda boldy.
- Kompanııa tájirıbesimen tanystyq. Eki el arasynda baılanys ornata alatyn múmkindikterdi talqyladyq. Kásipkerleri bizdiń oblysqa ınvestıtsııa salyp, mal bordaqylaý jumysyn júzege asyrýǵa daıyn. Osy jumys baǵytyn jandandyryp, qarym-qatynasty kúsheıtemiz, - deıdi Mańǵystaý oblysy ákiminiń orynbasary Qanat Quljanov.
Mazandaran provıntsııasynda balyq sharýashylyǵy da jaqsy damyǵan. Bekire tuqymdas balyqtar ónimin Qytaı men Arab elderine eksporttaıdy.
- Biz ár túrli aýylsharýashylyq ónimderin TMD, Arab elderi men Indııa, Qytaıǵa eksporttaımyz. Qazaqstanǵa azyq-túlik ónimderin, sonyń ishinde teńiz ónimderin, kókónisterdi jetkizgimiz keledi. Barlyǵyn qorapqa salyp, rettep, eksporttaýǵa daıyndaımyz. Ony tasymaldaýdyń birneshe joldary da bar, Kaspıı teńizi arqyly nemese Túrikmestan arqyly jetkizýdiń joldaryn qarastyryp jatyrmyz, - deıdi kásipker Halıl Gýlızade.
Kompanııa Mańǵystaý oblysyna aýyl sharýashylyǵy ónimderin tıimdi baǵamen jetkizýge usynys bildirdi. Aıta ketsek, Quryq teńiz porty arqyly jetkizýge múmkindik bar.
