Interpol eldiń alǵashqy «Kúmis habarlamasyn» shyǵardy
ASTANA. KAZINFORM — Aktıvterdi izdeý jáne qaıtarý boıynsha jańa quraldy engizý jónindegi pılottyq joba aıasynda Interpol Qazaqstan Respýblıkasynyń alǵashqy «Kúmis habarlamasyn» shyǵardy. Bul týraly Aktıvterdi qaıtarý jónindegi komıtetiniń baspasóz qyzmeti habarlady.
Bul qujat aktıvterdi qaıtarý jónindegi zań sýbektilerimen úlestes tulǵalardyń aktıvteri týraly aqparatty alýǵa baǵyttalǵan.
Esterińizge sala keteıik, byltyrǵy jyly Qazaqstan Bas prokýratýranyń Aktıvterdi qaıtarý jónindegi komıtettiń atynan Interpoldyń joǵaryda atalǵan pılottyq jobasyn engizý jónindegi jumys tobynyń quramyna kirgen bolatyn.
— Jobanyń qatysýshylary qatarynda Ulybrıtanııa, Ispanııa, Italııa, Katar, Qytaı, Kýveıt, Malta, Nıderland, Birikken Arab Ámirlikteri, Polsha, Portýgalııa, Reseı, Sıngapýr, AQSh, Frantsııa, Shvetsııa jáne taǵy basqalary sekildi 50-den astam el bar.
Jalpy bul qural Interpoldyń quramyna kiretin barlyq 196 memleket arasynda zańsyz ıemdenilgen aktıvter týraly aqparat almasýǵa múmkindik beredi.
Onyń kómegimen zańsyz ıemdenilgen aktıvter, onyń ishinde jyljymaly jáne jyljymaıtyn múlik, sondaı-aq aqsha qarajattaryn qadaǵalaý, sáıkestendirý jáne olar týraly málimetter alýǵa bolady, — delingen habarlamada.
Eger buryn Interpol negizinen izdeýdegi adamdar týraly aqparatty tirkegen bolsa, endigi ýaqytta aktıvterge de nazar aýdarylatyn bolady jáne tıisti negizder bolǵan jaǵdaıda, olar álem boıynsha ár túrli qýdalaý sharalaryna ushyraýy múmkin.
Komıtet vedomstvonyń syrtqy kontýrdaǵy múmkindikterin keńeıtý jáne aktıvterdi qaıtarý tetikterin jetildirý boıynsha turaqty túrde sharalar qabyldaıdy.
Aıta ketelik Aktıvterdi qaıtarý jónindegi komıtet qandaı halyqaralyq uıymdarmen tyǵyz jumys isteıtini týraly jazǵan edik.