Inflıatsııany jańa tásilmen esepteıdi
ASTANA. KAZINFORM – 2026 jylǵy qańtardan bastap Ulttyq statıstıka bıýrosy tutyný baǵalary ındeksin ınflıatsııany esepteýdiń jańartylǵan ádisin engizedi.
Endi tek dúkender men ınternettegi baǵalardy baqylaý ǵana emes, baqylaý-kassa mashınalary arqyly tirkelgen fıskaldyq túbirtek derekteri de esepke alynady. Bul halyqtyń naqty baǵalary men satyp alýlary týraly dálirek ári tolyq aqparat alýǵa múmkindik beredi.
Bul ózgeris memlekettik statıstıkany damytý kontseptsııasy men ulttyq derekter ekojúıesi sheńberinde júzege asyrylýda. Maqsat — resmı statıstıkanyń dáldigi, jyldamdyǵy jáne sapasyn arttyrý.
Fıskaldyq túbirtek derekterin paıdalaný úshin arnaıy keshendi ádisteme ázirlendi. Ol aqparatty tazalaý men óńdeýdi, taýarlardy avtomatty túrde jikteýdi, derekterdi toptaýdy jáne ındeksti esepteýdiń zamanaýı dınamıkalyq tásilin qamtıdy. Ádisteme tekserýden ótip, Halyqaralyq valıýta qory men Dúnıejúzilik bank tarapynan oń baǵa aldy.
— Sońǵy úsh jylda túbirtekterdegi taýar ataýlaryn daıarlaý jáne jikteý boıynsha aýqymdy jumys júrgizildi. Mıllıondaǵan taýar ataýlary tazalanyp, jikteldi. Búginde taldaýda 60 mıllıonnan astam túbirtek derekteri qoldanylady. Bul baǵalardy baqylaýdyń aýqymyn keńeıtedi jáne esepteýlerdiń dáldigin arttyrady. Mundaı tájirıbeni álemde tek birneshe el ǵana qoldanady, al Qazaqstan úshin bul mańyzdy qadam, — dedi bıýro basshysy Maqsat Turlybaev.
Baǵalardyń balamaly aqparat kózderin, onyń ishinde fıskaldyq túbirtekterdi paıdalaný Belgııa, Shvetsııa, Shveıtsarııa jáne basqa da elderde keńinen qoldanylyp keledi. Qazaqstanda bul tásil derekterdi jyldam alý, baǵanyń ózgeristerin dálirek baqylaý jáne statıstıkanyń analıtıkalyq múmkindikterin arttyrýǵa múmkindik beredi.
Týrızm jáne sport mınıstri Erbol Myrzabosynov jergilikti qonaqúıler men tamaqtaný oryndarynda týrısterge arnalǵan baǵa engizý máselesine pikir bildirgen edi.