Indonezııa resmı túrde BRIKS qataryna qosyldy

ASTANA. KAZINFORM – Indonezııa Syrtqy ister mınıstrligi 7 qańtar kúni málimdeme jasap, Ońtústik-shyǵys Azııadaǵy osy eldiń BRIKS-ke resmı múshe bolǵanyn habarlady. Bul týraly qytaılyq CNS jazdy.

- Qarqyndy damyp kele jatqan jáne ártaraptandyrylǵan ekonomıka retinde Indonezııa ekonomıkalyq turaqtylyqty, tehnologııalyq yntymaqtastyqty jáne ornyqty damýdy ilgeriletý, sondaı-aq klımattyń ózgerýi, azyq-túlik qaýipsizdigi men qoǵamdyq densaýlyq sııaqty jahandyq syn-qaterlerge qarsy is-qımyldy qosa alǵanda, BRIKS elderiniń kún tártibine belsendi úles qosýǵa beıildi ekenin bildirdi. Indonezııa basqa damýshy ekonomıkalarmen yntymaqtastyqty nyǵaıtý arqyly teńdik, ózara qurmet jáne turaqty damý sııaqty ortaq qaǵıdattardy alǵa jyljytyp, ádiletti, beıbit jáne órkendegen álem qurýǵa umtylady, - dep atap kórsetilgen málimdemede.

CNS-tiń jazýynsha, 2025 jyly BRIKS-ke tóraǵalyq etetin Brazılııa 6 qańtar kúni Indonezııanyń uıymǵa resmı qosylǵany týraly málimdeme jasaǵan.

Málimdemede Indonezııanyń BRIKS-ke qosylý týraly ótinishi Ońtústik Afrıkanyń Iohannesbýrg qalasynda 2023 jyly BRIKS kóshbasshylarynyń 15-shi sammıtinde maquldanǵany aıtyldy.

Qazaqstan 2025 jyldyń 1 qańtarynan bastap BRIKS-ke seriktes el atandy. BRIKS-tiń 2024 jyly qarasha aıynda Qazan qalasynda ótken kezekti sammıtiniń sheshimine sáıkes, bizdiń elimizden basqa, bul sanatta Belarýs, Bolıvııa, Indonezııa, Taıland, Kýba, Ýganda, Malaızııa jáne Ózbekstan da bar edi.

Aıta keteıik, Tramp BRIKS elderi dollardan bas tartqan jaǵdaıda baj salyǵy salynatynyn eskertti.