Ilon Masktyń baılyǵy 500 mlrd dollarǵa jetti

ASTANA. KAZINFORM — Amerıkalyq kásipker Ilon Masktyń baılyǵy 500 mlrd dollarǵa jetip, jańa tarıhı mejeni eńserdi, dep habarlaıdy TASS agenttigi.

Ol X áleýmettik jelisi, SpaceX, xAI jáne Tesla kompanııalarynyń ıesi.

Forbes dereginshe, 1 qazandaǵy saýda qorytyndysy boıynsha Masktyń kapıtaly 500 mlrd dollarǵa jetken. Keıin kórsetkish sál tómendep, 499,1–499,5 mlrd dollar aralyǵynda baǵalandy. Tek Tesla aktsııalarynyń bir kúnde 4 paıyzǵa ósýi bıznesmenniń baılyǵyn 9,3 mlrd dollarǵa arttyrǵan.

Sarapshylar Masktyń baılyǵynyń ósýin birneshe faktorlarmen baılanystyrady. SpaceX kompanııasynyń quny sońǵy aılarda 50 mlrd dollarǵa ósip, jalpy baǵasy 168 mlrd dollarǵa jetken. Sonymen birge xAI kompanııasy men X áleýmettik jelisiniń birigýi nátıjesinde jańa xAI Holdings quny 113 mlrd dollarǵa baǵalandy. Masktyń úlesi – 53 paıyz, shamamen 60 mlrd dollar.

Forbes-tyń eń baı adamdar reıtınginde Mask alǵash ret 2021 jyly Amazon negizin qalaýshy Djeff Bezosty basyp ozǵan edi. Ol kezde kásipkerdiń dáýleti 271,3 mlrd dollar dep baǵalanǵan. Sodan beri ol birneshe ret reıtıngtegi kóshbasshylyqty joǵaltyp, qaıta qaıtaryp otyrdy.

Mıllıarderler reıtınginde Mask birinshi orynda tur. Ekinshi orynda – Oracle kompanııasynyń dırektorlar keńesiniń tóraǵasy Larrı Ellıson ($351,6 mlrd), úshinshi orynda – Meta kompanııasynyń negizin qalaýshy Mark Tsýkerberg ($246,1 mlrd). Sondaı-aq tizimde Amazon negizin qalaýshy Djeff Bezos ($233,2 mlrd) pen Google negizin qalaýshy Larrı Peıdj ($204,6 mlrd) bar.

Buǵan deıin Ilon Mask kompanııasynda 500 qyzmetker qysqartýǵa ushyraǵan bolaty.