Ilon Mask Tramptyń zań jobasyn synǵa aldy

ASTANA. KAZINFORM – Ilon Mask X áleýmettik jelisinde respýblıkashyldardyń zań jobasyn qatal synǵa alyp, onyń «naǵyz masqara» ekenin jazdy, dep habarlaıdy NBC News.

- Keshińiriz, biraq men endi buǵan shydaı almaımyn. Bul Kongress shyǵyndary týraly adamnyń ashýyn týdyratyn jıirkenishti zań jobasy. Osy jobaǵa daýys bergender ózderiniń durys istemegenin biledi, - dep jazdy Ilon Mask H-te.

Mask «shoshqa tárizdi zań jobasyna» silteme jasaǵanda «pork-filled» «shoshqa etimen toltyrylǵan» termınin qoldanǵan. Saılaýshylardyń, bıznesmenderdiń nemese saıasatkerlerdiń keıbir kishi toptarynyń múddesi úshin saıasatkerler lobbı jasaıtyn bıýdjet shyǵyndaryn osylaı ataıdy.

Mask málimdemesin Kongrestiń qolǵa alynǵan sharalary tapshylyqty 2,3 trln dollarǵa deıin ulǵaıtatynyn aıtqannan keıin jasady. Sebebi salyqtyq jeńildikter, mıgratsııalyq qamtamasyz etý sharalaryna bólinetin qarjynyń shyǵyny únemdeýden asyp túspek.

NBC News basylymynyń habarlaýynsha, Masktyń narazylyǵyn áleýmettik medıa arqyly bildirýiniń artynda tórt másele bolýy múmkin.

Birinshiden, zań jobasynda elektromobılderge jeńildik joq. Al bul óz kezeginde Tesla úshin qajet nárse. Sondaı-aq Mask Azamattyq avıatsııanyń federaldyq basqarmasy onyń Starlink júıesin paıdalanǵanyn qalaǵan edi. Buǵan qosa zań jobasynda Mask-tiń odaqtasy Djared Aızekman NASA ákimshisi laýazymyna usynylý týraly aıtylmaǵan. Sonymen qatar Mask arnaıy memlekettik qyzmetshi laýazymynda 130 kúndik merzimnen kóp otyrmaq bolǵan. Alaıda Aq úı buǵa kelispedi.

- Biz Ilonnyń DOGE úshin istegen isterine qurmetpen qaraımyz. Bul másele boıynsha bizdiń pikirlerimiz ártúrli. Onyń óz oıyn bildirýge quqy bar, árıne, alaıda biz aldyǵa bar jyldamdyqpen jyljyǵaly turmyz, - Senattaǵy kópshilik kóshbasshysy Djon Tıýn tilshilerge.

Aq úıdiń baspasóz hatshysy Kerolaın Lıvıtt: «Tyńdańyzdarshy, prezıdent bul zań jobasynda Ilon Masktyń qaı pozıtsııada turǵanyn qazirdiń ózinde biledi. Bul prezıdenttiń pikirin ózgertpeıdi. Bul úlken, ádemi zań jobasy jáne ol ony ustanyp otyr, - dep habarlady.

Buǵan deıin mıllıarder, AQSh úkimetiniń tıimdiligi departamentiniń (DOGE) basshysy Ilon Mask AQSh ákimshiligindegi qyzmet merzimi aıaqtalyp jatqanyn habarlady.