Hýn Bın: Silk Way Star bizdi bir úlken otbasyna aınaldyrdy
ASTANA. KAZINFORM — Ortalyq kommýnıkatsııalar qyzmetiniń alańynda «Silk Way Star» halyqaralyq vokaldyq baıqaýynyń fınaldyq qorytyndylaryna arnalǵan baspasóz konferentsııasy ótti. Sharada qytaılyq qazylar alqasynyń múshesi Hýn Bın bıylǵy jobanyń mádenı máni men bolashaq josparlary týraly pikirimen bólisti.
Hýn Bınniń aıtýynsha, ol baıqaýdyń basynan bastap CCTV tanystyrǵan baǵdarlamaǵa qatysyp, jobanyń jaı ǵana án saıysy emes, túrli elder men etnostardyń mádenı jaqyndasýyna múmkindik beretin mańyzdy alań ekenin tereń sezingen.
— Bıylǵy maýsymda efır arqyly da, kóptegen kezeńder arqyly da árbir qatysýshyny jaqsy tanyp aldyq. Fınalda biz tek daýystyń myqtylyǵyn baǵalaǵan joqpyz. Eń bastysy — ár ulttyń mádenıetin qabyldaý, ózara túsinistik jáne qatysýshylardyń bir-birine degen baýyrmal nıeti boldy. Bul baıqaý bizdi úlken bir otbasyna aınaldyrdy, — dedi ol.
Sonymen qatar Hýn Bın óziniń Qazaqstanmen baılanysyn eske aldy. Ol jubaıymen birge alǵash ret 1997 jyly Qazaqstanǵa kelip, «Voice of Asia» halyqaralyq baıqaýyna qatysqan. Sol jyly onyń jubaıy ánshi retinde úshinshi oryn alǵan.
— Osy oqıǵa Qazaqstanǵa degen alǵashqy áserimdi qalyptastyrdy. Arada otyz jylǵa jýyq ýaqyt ótken soń qaıta oralý — men úshin erekshe sezim, — dep atap ótti ol.
Qytaılyq qazylar alqasynyń múshesi kelesi jyly Qytaıda osyǵan uqsas baıqaý uıymdastyrylatynyn habarlady. Onyń aıtýynsha, joba aýqymy budan da keńeıip, Qazaqstanda jınaqtalǵan tájirıbe tolyq eskeriletin bolady.
— Kelesi jylǵy jobada mýzykalyq dırektor retinde jumys isteý týraly usynys tústi. Bul men úshin úlken jaýapkershilik jáne zor qýanysh. Biz Qytaıda da joǵary deńgeıdegi halyqaralyq mádenı is-shara ótkizýdi maqsat etip otyrmyz, — dedi Hýn Bın.
Eske salsaq, keshe Astanada «Silk Way Star» halyqaralyq jobasynyń grand-fınaly máresine jetip, Mıshel Djozef (Mońǵolııa) jobanyń jeńimpazy atandy.