Harbın-2025: Qazaqstan úshin oljasy az Aq Azıada
ASTANA. KAZINFORM – Búgin Qytaıdyń Harbın qalasynda ótken IX qysqy Azııa oıyndary máresine jetti. Ókinishke qaraı, Qytaıdyń qıyr shyǵysynda alaýy tutanǵan saryqurlyq dodasy qazaq sportshylarynyń qysqy Azııa oıyndaryndaǵy eń sátsiz jarystarynyń biri retinde este qaldy. Nege?
Bulaı deıtinimiz, osyǵan deıin Qazaqstan Ulttyq quramasy qysqy Azııa oıyndarynda 6 altynnan kem alyp kórmegen bolatyn. Mine, bıyl tuńǵysh ret eń tómengi kórsetkish kórsettik, qorjynymyzǵa 4 altyn ǵana tústi.
Qysqy Azııa oıyndary alǵash ret 1986 jyly Japonııanyń Sapporo qalasynda uıymdastyrylǵany barshamyzǵa belgili. Alaıda, ol kezde Qazaqstan KSRO-nyń quramynda bolǵandyqtan, bul dodalarǵa táýelsiz el retinde qatysa almaǵan edi.
Qazaqstan quramasy qysqy Azııa oıyndaryna táýelsiz el retinde 1996 jyldan bastap qatysa bastady. Sol jyldardan beri qaraı, otandastarymyz Harbındi qosa eseptegende jetinshi qysqy Azııa oıyndaryna qatysyp otyr. Endi, sol oıyndardyń árqaısysynda Qazaqstan quramasy qandaı kórsetkishterge qol jetkizgenine jeke-jeke toqtalyp óteıik.
Harbın – 1996 jyl: (Qytaı)
Qazaqstan quramasy qysqy Azııa oıyndaryna alǵash ret 1996 jyly qatysty. Bul doda da týra Qytaıdyń Harbın qalasynda ótken bolatyn.
Onda otandastarymyz 14 altyn, 9 kúmis, 8 qola, jalpy 34 júlde jeńip alyp, jalpykomandalyq esepte jarys qojaıyndary Qytaıdan 1 ǵana altynǵa qalyp, ekinshi orynǵa ıe bolǵan edi. Osylaısha, alǵashqy oıyndarynda-aq ózderiniń saryqurlyq dodasynda kil myqtylar qatarynan kórine bildi.
Kanvondo – 1999 jyl: (Ońtústik Koreıa)
El sportshylary ekinshi qysqy Azııa oıyndaryn 1999 jyly Ońtústik Koreıanyń Kanvon qalasynda ótkizdi. Bul oıyndar da qazaq sportshylary úshin sátti boldy dep aıtýǵa bolady.
Sebebi – otandastarymyz 10 altyn, 8 kúmis jáne 7 qola medal jeńip alyp, jalpy esepte úshinshi orynǵa qol jetkizdi. Bul básekede Qytaı quramasy 15 altyn, 10 kúmis, 11 qola medalmen kósh bastasa, ekinshi orynǵa Qazaqstan quramasynan bir ǵana altyn artyq alǵan jarys qojaıyndary ıe boldy. Olar – 11 altyn, 10 kúmis, 14 qola medal jeńip aldy.
Aomorı – 2003 jyl: (Japonııa)
Qazaqstan quramasy úshinshi qysqy Azııa oıyndaryn 2003 jyly Japonııanyń Aomorı qalasynda ótkizdi. Atalǵan jarysta otandastarymyz jalpykomandalyq esepte taǵy bir satyǵa tómendep, tórtinshi orynǵa jaıǵasty.
Aomorı qalasynda ótken saryqurlyq saıysynda jerlesterimizge 7 altyn, 7 kúmis, 6 qola medal buıyrdy. Nátıjesinde tórtinshi orynǵa ıe boldy. Bul joly bas júldeni 27 altyn, 26 kúmis, 23 qola medalǵa qol jetkizgen japonııalyqtar jeńip aldy. Al ekinshi orynǵa 10 altyn, 8 kúmis, 10 qola jeńip alǵan Ońtústik Koreıa sportshylary ıe boldy. Úzdik úshtikti 9 altyn, 11 kúmis, 13 qola medalmen Qytaı quramasy túıindedi.
Chanchýn – 2007 jyl: (Qytaı)
Otandastarymyz tórtinshi qysqy Azııa oıyndaryn 2007 jyly Qytaıdyń Chanchýn qalasynda ótkizdi. Dál osy qysqy Azııa oıyndarynda jerlesterimiz ózderi qatysqan Azııa oıyndary tarıhyndaǵy eń tómengi kórsetkishke qol jetkizgen bolatyn.
Naqtyraq aıtsaq, 2007 jylǵy Aq Azıada oıyndarynda sportshylarymyz 6 altyn, 6 kúmis, 6 qola medalmen jalpy komandalyq esepte taǵy da tórtinshi orynǵa taban tiredi. Úshinshi oryn alǵan koreıalyqtar Qazaqstan quramasynan 3 altynǵa artyq ıelendi. Olar 9 altyn, 13 kúmis, 11 qolaǵa qol jetkizse, birinshi oryndy jarys qojaıyndary ıelendi. Olar 19 altyn, 19 kúmis, 23 qola medalǵa qol jetkizdi. Al ekinshi oryndy 13 altyn, 9 kúmis, 14 qola medalmen Japonııa quramasy qanjyǵasyna baılady.
Almaty-Astana – 2011 jyl (Qazaqstan)
Otandastarymyz úshin besinshi qysqy Azııa oıyndary tarıhı jetistikterge toly boldy. Arý qalamyz Almaty men elordamyz Astana qalasynda ótken VII qysqy Azııa oıyndarynda el sportshylary birden 70 medalǵa qol jetkizdi. Onyń 32-si altyn, 21-i kúmis, al 17-si qola medal. Osylaısha, qazaqstandyqtar óz elimizde ótken dodada jalpykomandalyq esepte kósh bastap, el mereıin asyrdy.
VII Qysqy Azııa oıyndarynda ekinshi orynǵa 13 altyn, 24 kúmis, 17 qola medalmen Japonııa quramasy jaıǵassa, úzdik úshtikti Ońtústik Koreıa sportshylary túıindedi. Olar 13 altyn, 12 kúmis, 13 qola medal jeńip aldy. Al Qytaı quramasy 11 altyn, 10 kúmis, 14 qola medalmen tórtinshi orynǵa jaıǵasty.
Osy oraıda aıta keteıik, Azıada oıyndaryn 2011 jyly Qazaqstan alǵash ret ótkizdi. Jarystar Astana men Almaty qalalarynda ótkizildi.
Sapporo – 2017 jyl: (Japonııa)
El sportshylary altynshy Aq Azıadany 2017 jyly Japonııanyń Sapporo qalasynda ótkizdi. Kúnshyǵys elinde ótken saıys ta qazaq sportshylary úshin sátti boldy dep aıtýǵa bolady.
Olaı deıtinimiz – Sapporo tórinen el sportshylary 32 medal jeńip aldy. Onyń 9-y altyn, 11-i kúmis, 12-si qola. Osylaısha jalpykomandalyq esepte tórtinshi oryndy qanjyǵalap qaıtty.
Japonııada ótken kezekti oıyndarda jalpy esepte jarys qojaıyndary bas júldeni enshiledi. Olar 27 altyn, 21 kúmis, 26 qola medalǵa qol jetkizse, Ońtústik Koreıa sportshylary 16 altyn, 18 kúmis, 16 qolamen ekinshi orynǵa jaıǵasty. Al qytaılyq sportshylar 12 altyn, 14 kúmis, 9 qola medalmen úzdik úshtikti túıindegen bolatyn.
Harbın – 2025 jyl: (Qytaı)
Mine, búgin ǵana alaýy songen Harbın Qysqy Azııa oıyndarynda qazaqstandyq sportshylar 4 altyn , 9 kúmis, 7 qola medalmen taǵy da jalpy esep boıynsha tórtinshi orynǵa turaqtady.
Osylaısha Qytaıdyń Harbın qalasynda ótken IX qysqy Azııa oıyndary Qazaqstannyń óz tarıhyndaǵy eń sátsiz aıaqtalǵan oıyn retinde este qaldy. Óıtkeni burynǵy eń tómen kórsetkishimiz 2007 jyly tirkelgen bolatyn. Ol kezde taǵy da Qytaıdyń Chanchýn qalasynda ótken Azııa oıyndarynda 6 altyn medalǵa qol jetkizgenbiz. Mine, búgin taǵy da Qytaıdyń taǵy bir qalasy Harbında ótken sońǵy Azııa oıyndarynda alǵash ret 4 altyn medalmen shektelip otyrmyz.
Bul joly qytaılyq sportshylar óz elinde ótken oıyndardyń kóshin bastady. Jarys qojaıyndary 32 altyn, 27 kúmis, 26 qola medal jeńip aldy. Al 16 altyn, 15 kúmis, 14 qola ıelengen Ońtústik Koreıa sportshylary ekinshi orynǵa jaıǵassa, úzdik úshtikti Japonııa sportshylary qorytyndylady. Olardyń enshisinde 10 altyn, 12 kúmis, 15 qola medal bar.
Harbın qalasynda ótken IX Qysqy Azııa oıyndarynda úzdik nátıje kórsetken 5 el:
1. Qytaı — 85 (32-27-26);
2. Ońtústik Koreıa — 45 (16-15-14);
3. Japonııa — 37 (10-12-15);
4. Qazaqstan — 20 (4-9-7);
5. Fılıppıny — 1 (1-0-0);
5. Ózbekstan — 1 (1-0-0)
Osyǵan deıin habarlaǵanymyzdaı, Qazaqstan quramasy short-trekten qysqy Azııa oıyndarynyń chempıony atandy.
Keıinirek Qazaqstan qorjynyna ekinshi altyn medal tústi.
Bıatlonnan Qazaqstan erler quramasy altyn jáne kúmis medal enshiledi.
Hokkeıden Qazaqstan erler quramasy chempıon atandy.