«Habar» telearnasy mereke kúnderi ne usynady
Uly dalanyń eń basty merekesine oraı ulttyq kınotýyndylardyń legi usynylady.
15 jeltoqsan kúni saǵat 15:00-de «Elbasy joly. Tyǵyryqtan jol tapqan» kartınasy kórsetiledi. Bul - «Elbasy joly» kınoepopeıasynyń tórtinshi bólimi. Týyndyda basty keıipkerdiń Qaraǵandy metallýrgııa kombınaty partııa uıymynyń basshysy retinde qalyptasý kezeńi sýretteledi. Sondaı-aq sol kúni saǵat 16:40-ta «Qazaq handyǵy» kórkemfılmi josparlanǵan. Kartına rejısseri Rústem Ábdirashov. Kıno Іlııas Esenberlınniń «Kóshpendiler» trılogııasy jelisimen túsirilip, qazaq handyǵynyń qurylý kezin sýretteıdi.
17 jeltoqsan saǵat 17:45-te kórermender «Kóshpendiler» tarıhı fılmin tamashalaı alady. Bul kınotýyndy da І.Esenberlınniń «Kóshpendiler» romanynyń jelisi boıynsha túsirilgen. Dramada qazaq halqynyń tarıhy, mahabbat pen dostyq, XVIIІ ǵasyrdaǵy oqıǵalar sýretteledi. 18 jeltoqsan 16:45-te, merekelik kınolar legin Satybaldy Narymbetovtyń «Amanat» kartınasy jabady. Fılmniń basty ıdeıasy - rýhy ór, táni bekem, qaısar ata-babamyzdyń bizge amanattaǵan táýelsizdiktiń qunyn bilý, ony saqtap qalý. Qazaq halqynyń táýelsizdikke jetý jolyndaǵy taýqymetti taǵdyryn umyttyrmaý, jas urpaqtyń esine sala otyryp, máni men mańyzyn túsindirý. Kınoda HІH ǵasyrdyń ortasy, ıaǵnı qazaqtyń sońǵy hany Kenesary Qasymovtyń bostandyq jolyndaǵy kúresi, HH ǵasyr ortasy men 60-jyldardyń sońy, sol Kenesary han bastaǵan ult-azattyq kóteriliske qatysty zertteýleri úshin 25 jylǵa bas bostandyǵynan aıylyrǵan alash arysy Ermuhan Bekmahanovtyń taǵdyry sóz bolady.
Atap ótilgendeı, arnanyń oıyn-saýyq baǵdarlamalary da daıyn. Kórermender demalys kúnderin Meırambek Besbaevtyń «Elge sálem» kontsertimen bastaıdy (15 jeltoqsan, 22:30). Al 16 jeltoqsan kúni (12:15) qazaq mýzyka ónerinde óshpes iz qaldyrǵan sazger Nurǵısa Tilendıevtiń shyǵarmashylyǵyna arnalǵan «Júregim meniń» kontserti efırge shyǵady. Sonymen qatar elimizdiń tanymal ánshileri eń úzdik patrıottyq áýenderin Sizderge tartý etedi! 16 jeltoqsan kúni saǵat 17:20-da «Máńgilik el. Táýelsizdikke tartý» kontserti, al 19:10-da pıanıst, Qazaqstannyń halyq ártisi Jánııa Áýbákirovanyń «Samǵaý» atty shyǵarmashylyq keshi josparlanǵan. Qazaq ánderi sahna tórinde sımfonııalyq orkestrdiń súıemeldeýimen jańasha reńkte oryndalady. Kesh qonaqtarynyń qatarynda elimizdiń klassıkalyq jáne estrada ánshileri Rústem Nurjigitov, Shaba Ádenqul, Ǵalymjan Moldanazar, Syrymtaı Eńsepov, Jubanysh Jeksenuly jáne t.b. bar.
Belgili kompozıtor, ánshi Jeńis Seıdollaulynyń «Saǵan ánim» shyǵarmashylyq keshin 16 jeltoqsan saǵat 22:50-de tamashalaısyzdar. Kesh júrgizýshisi - Tursynbek Qabatov. Odan bólek Meırambek Besbaev, Sáken Maıǵazıev, Mádına Sádýaqasova, Tóreǵalı Tóreáli, Aıqyn Tólepbergen, Móldir Áýelbekova syndy qazaq estaradasynyń juldyzdary ásem týyndylaryn oryndaıdy.
Sondaı-aq taıaýda ǵana óziniń alǵashqy shyǵarmashylyq keshin Móldir Áýelbekova bergen bolatyn. 15 jyldan beri qazaq estradasynyń sahnasyn baǵyndyryp, eńbegimen talaı asýdan asqan ánshiniń «Týǵan el» atty kontsertin 17 jeltoqsan kúni saǵat 21:30-da «Habar» telearnasynan tamashalańyzdar. Dýmandy keshte Meırambek Besbaev, Tóreǵalı Tóráli, Ushqyn Jamalbek, Raıym Ýaıys, «Nazar» toby syndy otandyq estrada juldyzdary jandy daýysta óner kórsetedi.
Sonymen qatar elimizdiń ótkeni men qazirgi kezeńdegi jetistikteri men tabystary týraly derekti fılmder kórsetiledi.
