Ǵylym salasynyń úzdikteri marapattaldy
ASTANA. 16 aqpan. QazAqparat - Búgin Astanada QR Bilim jáne ǵylym mınıstri Baqytjan Jumaǵulov 2011 jyldyń qorytyndysy boıynsha úzdik atanǵan ǵalymdardy marapattady.
Atap aıtqanda, Jaratylystaný ǵylymdary salasynda úzdik ǵylymı zertteý eńbegi úshin Qanysh Sátbaev atyndaǵy syılyqqa «Jer, metallýrgııa jáne baıytý ǵylymdary ortalyǵy» AQ ujymy ıe boldy. Olardyń ishinde ortalyq basshysy - Zeınet Ábisheva, ǵylymı qyzmetkerler - Aınash Sháripova jáne Saltanat Sadyqanova, sondaı-aq Talǵat Aıtqalıev. Gýmanıtarlyq ǵylymdar salasyndaǵy Shoqan Ýálıhanov atyndaǵy syılyq Turan ýnıversıtetiniń professory Alıda Áshimbaevaǵa buıyrdy. Budan basqa, Pedagogıka boıynsha Ybyraı Altynsarın atyndaǵy syılyq - Qazaq ulttyq ýnıversıtetiniń professory Jaqan Moldabekov, al jas ǵalymdardy yntalandyrýǵa arnalǵan Dinmuhammed Qonaev atyndaǵy syılyqty Qaraǵandy memlekettik ındýstrııalyq ýnıversıtetiniń magıstranty Erbol Shabanov, Hımııa-metallýrgııa ınstıtýtynyń zerthana ınjeneri Erbol Muhambetqalıev jáne ǵylymı qyzmetker Valentına Salına ıelendi.
