Gúlmıra Satybaldy ózine taǵylǵan aıyppen kelispeıdi
ALMATY. KAZINFORM – Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldy men onyń burynǵy júrgizýshisi Mádı Batyrshaevqa qatysty sot otyrysy jalǵasyp jatyr.
«Men taǵylǵan aıyppen kelispeımin. Júnisovtiń zańsyz bergen aryzyn bizdiń quqyq qorǵaý organdary ádiletti túrde zerttep, retteıdi dep senip, tergeý aıasynda kýálik bergen joqpyn», - dep bastady sózin aıyptalýshy.
Aıtýynsha, jábirlenýshi kásipker Abaı Júnisovke osydan 20 jyl buryn sińlisi turmysqa shyqqan.
«Abaı Júnisov uzaq jyl meniń qart ata-anamnyń úıinde birge turdy. Týystarym Júnisov pen belgili kásipker D.Ydyrysov arasyndaǵy janjaldy sheshýge kómektesti. Sebebi Ydyrysov Abaıdy aqsha jymqyrdy dep aıyptady. Men kúıeý balamdy aıadym. Jıenderim men sińilimdi oılap, onyń barlyq qaryzyn jaýyp, qaıta kásip bastaýyna kómektestim. «Dáýir» kompanııasyna jumysqa turǵyzdym», - dedi ol.
G.Satybaldy Abaı Júnisov ekeýi birlesken kásipti qalaı bastaǵanyn aıtyp berdi.
«2011 jyly Júnisov «Baur Kazakhstan» JShS qurýdy usyndy, qujattarǵa sáıkes, onyń jalǵyz ıesi boldy. Negizi aktsııalar bylaı taratyldy: maǵan 34%, Aıbatyr Jumaǵulovqa 33%, Júnisovke tıesilisi 33 paıyz. Júnisov bárin ózi basqaryp otyrdy. Men tek jan-jaqty qoldaý kórsetip, kómektesýge tyrystym», - dedi ol.
Alaıda 2018 jyldyń sońyna qaraı kompanııa bonkrotqa ushyrady.
«Kompanııanyń bonkrotqa ushyraǵanyn estip jáne meni jaqyn adamym, sondaı-aq qudalarym Qasym men Altaı Júnisovter aldap, tonap ketkenin bilgende, qatty aýyryp qaldym. Insýlt alyp jansaqtaý bólimine tústim. Al 2021 jyly onyń YouTube kanaly arqyly kompanııalaryn tartyp aldy dep aıyptaýy úlken soqqy boldy», - dedi Gúlmıra Satybaldy.
Buǵan deıin kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtqan edi.
Aıta keteıik, aldyn ala tyńdaý kezinde, aıyptalýshy G.Satybaldy alqabıler sotyna qatyspaıtynyn jetkizgen bolatyn.
Esterińizge sala keteıik, byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyryldy.
