Grýzııada túrik áskerı ushaǵy apatqa ushyrady

ASTANA. KAZINFORM — Ázerbaıjannan ushyp shyqqan Túrkııanyń C-130 áskerı-kólik ushaǵy Grýzııa aýmaǵynda apatqa ushyrady, dep habarlaıdy TASS.

Belgili bolǵandaı, 11 qarasha kúni Túrkııanyń C-130 ushaǵy Gıandja qalasynyń áýejaıynan ushyp shyǵyp, Grýzııanyń Sıgnagı mýnıtsıpalıteti aýmaǵynda qulaǵan.

Ushaq Grýzııa shekarasynan ótkennen keıin birneshe mınýttan soń, shekaradan shamamen 5 shaqyrym jerde radarlardan joǵalyp ketken. Grýzııanyń áýe navıgatsııasy qyzmetiniń málimetinshe, ushaq apat aldynda dabyl belgisin bermegen. Qazirgi ýaqytta apattyń sebebi men borttaǵy adamdar sany týraly resmı aqparat joq.

NTV telearnasynyń habarlaýynsha, ushaqta Túrkııa, Grýzııa jáne Ázerbaıjan áskerı qyzmetkerleri bolǵan. Alaıda bul málimet resmı túrde rastalmady.

Túrkııa prezıdenti Rejep Taııp Erdoǵan ushaq apaty bolǵan aımaqta izdestirý-qutqarý jumystary júrgizilip jatqanyn málimdedi.

Grýzııa Іshki ister mınıstrliginiń dereginshe, oqıǵa boıynsha áýe kóligin paıdalaný nemese qaýipsizdik erejelerin buzý faktisi boıynsha qylmystyq is qozǵaldy.

Sondaı-aq, Grýzııa bıligimen birlese otyryp izdestirý jáne qutqarý operatsııalary bastalǵany habarlandy.

Ázerbaıjan prezıdenti Ilham Álıev áskerı ushaq apatyna baılanysty Túrkııa prezıdentine kóńil aıtý jedelhatyn joldady.

Buǵan deıin Vashıngton shtatynda tikushaq apatqa ushyrap, 4 amerıkalyq áskerı qyzmetker qaza tapqany anyqtaldy.